De 15. August geet et vu Baaschtnech op Amnéville an domat ganz no u Lëtzebuerg laanscht. Bei den Olympesche Spiller wier d'Fraecourse wéinst der Kuliss an dem Publikum een eemolegt Erliefnis gewiescht, och wa leeschtungsméisseg méi dra gewiescht wier, esou d'Christine Majerus.
Trotz hirer Chute ass si stolz op hir Course bei den Olympesche Spiller. Si relativiséiert awer hir sportlech Leeschtung am Allgemengen. "Ech war ee Moment realistesch genuch ze wëssen, datt ech vläicht net dat Allerbescht sinn", seet d'Cyclistin am 100,7-Interview. Am beschte wier si an der Kapitänsroll an am Support, an do géif d'Christine Majerus hir Efforte ginn.
Déi siwefach Sportlerin vum Joer hält no dëser Saison mat hirer Karriär op - ee konkrete Plang fir duerno huet si nach net, si géif nom Tour de France eng Rei Gespréicher iwwer hir berufflech Zukunft féieren, sot si. Dem Sport géif si awer niewebäi erhale bleiwen.