Mat zwee méi laange Live-Tracks erënnere mir un deen am Mee vun dësem Joer verstuerwene franséischen Auteur/Compositeur/Interpret Jean-Louis Murat, biergerlechen Numm Jean-Louis Bergheaud: e Mann, deen engersäits musikalesch gär méi zeréckhalend-poetesch war - quitt datt hien och alt emol zolidd gerockt huet -, anerersäits awer och fir seng Coups de gueule bekannt war, vun der Long op d’Zong geschwat huet an an der Haaptsaach géint de Musekbusiness gewiedert huet, géint déi grouss Plackefirmen, dee fir hien ze vill mat groussen Nimm op d’Nummer sécher ginn, fir dass d’Keess stëmmt an dobäi manner prominent Leit an den Nowuess vernoléissegen.
Fir säi méi klenge belsche Label PIAS (Play It Again Sam) huet de Jean-Louis Murat am September 2014 zu Paräis an der ‘Maroquinerie’ den Album ‚Live Aux (Pias) Nites‘ opgeholl. Eng 45 Minutten si vun dësem Optrëtt zeréckbehale ginn, just 5 Stécker, deemno méi laang Interpretatiounen, dat mat Material vu sengem deemools aktuellen Studio-Album ‚Babel‘. Begleet gëtt hien vum Delano Orchestra, exzellent Museker déi aus senger Heemecht, der Auvergne, kommen. Als Invitée derbäi ass ausserdem d’Morgane Imbeaud vun der Band ‘Cocoon’.
D’Plack war deemools a limitéierter LP-Oplag fir den ‘Disquaire Day’ op de Maart komm, ass antëschent awer och op anere Supporten ze kréien.
D’Playlist vun haut:
01) Iggy Pop – Home (Brick By Brick, 1990)
02) Screaming Trees – No One Knows (Sweet Oblivion, 1992)
03) The Cure – A Letter To Elise (Wish, 1992)
04) The War On Drugs - Under The Pressure (Lost In The Dream, 2014)
05) Kurt Vile – Wakin On A Pretty Day (Wakin On A Pretty Daze, 2013)
06) Jean-Louis Murat – Qu’est-ce qu’au fond du cœur (Live Aux PIAS Nites, 2014)
07) Jean-Louis Murat – Blues Du Cygne (Live Aux PIAS Nites)
08) Patti Smith – Gimme Shelter (Twelve, 2007)
09) Thurston Moore – Smoke Of Dreams (Rock ‘n Roll Consciousness, 2017)
10) Groovin’ With Mr. Bloe (Groovin’ With Mr. Bloe. 1970)