D'Covid-Impfcampagne bei Jonke wäert ganz enk suivéiert ginn, dat versprécht d'Isabel de la Fuente, Spezialistin fir Infektioune bei Kanner am CHL. Et géif elo vill drëm goen, d'Elteren ze rassuréiere fir datt si hir Kanner impfe loossen.

Am Gesondheetsberäich fuerderen zwielef Organisatiounen, datt déi geplangt Reform vun der Ausbildung nach eng Kéier iwwerschafft gëtt. D'Propos déi am Moment um Dësch läit, wier eng "absolutt Chaosreform", sou de Pitt Bach vum OGBL.

Trotz internationaler Kritik a Belarus, sinn de Journalist Roman Protasevitch a seng Partnerin nach ëmmer an Detentioun. Si ware festgeholl ginn, andeems déi belarussesch Autoritéiten ee Passagéierfliiger zu enger Landung gezwongen haten.

Fir datt Mënsche mat enger Behënnerung méi Chancen um Aarbechtsmaart kréien, mussen d'Gesetzer méi contraignant ginn. Där Meenung ass den Andrea Di Ronco an eisem Fräie Mikro.

D'ASBL ProVelo begréisst, datt d'Stad Lëtzebuerg eng Vëlosmanifestatioun e Samschdeg awer autoriséiert. D'Stad hätt awer nëmmen noginn, well ProVelo eng Plainte beim Verwaltungsgeriicht wollt areechen, sou d'Presidentin vu ProVelo.

D'Diskussiounen ëm e Verbuet vun der ProVelo Demonstratioun nächste Samschden an der Stad sinn nach net ofgeschloss. De Mëtteg soll am Stater Schäfferot nach eemol doriwwer berode ginn.

Quasi zwou Wochen nodeems de Jürgen Conings ënnergedaucht ass, gët ët vun him weiderhin keng Spuer. Mä um politeschen a militäresche Plang gi Konsequenze gezunn.

Fir den Horeca-Beräich kéinten et nom 12. Juni manner streng Mesurë ginn: wat d'Regierung plangt soll dëse Mëttwoch oder Freideg matgedeelt ginn. Eng Optioun wier d'Ofschafe respektiv eng weider manner restriktiv Ausgangsspär.

D'Luxair wëllt weider un hire Kuerzstreckeflich festhalen, esou laang et op deene Strecken keng Zuchverbindunge ginn, déi en änleche Confort bidden, sou de Luxair-Generaldirekter Gilles Feith.

Wann een en Haus wëllt kafen oder eng Firma wëllt grënnen, sollen déi entspriechend notarial Akten an Zukunft digital ënnerschriwwe ginn.