Um EU-USA-Sommet soll eng nei Ära un Handelsrelatiounen tëschent deenen zwee agelaut ginn. Den Handelssträit, deen ënner dem Donald Trump eskaléiert war, ass awer och ënner dem Joe Biden net bäigeluecht.

D'CFL huet d'lescht Joer iwwer 10 Millioune Passagéier manner transportéiert wéi 2019. Den Netto-Benefice vum Grupp ass op 4,6 Milliounen Euro zeréck gaangen: dat waren iwwer 74 Prozent manner wéi 2019.

Den 9. Juni koum et zu enger ganzer Partie Ouverturen an der Belsch, nodeems d'Land d'Impfvitesse erhéicht hat an e positiven Trend an de Spideeler ze gesi war. Esou guer Museksfestival wiere vu Mëtt August u méiglech, seet de Premierminister.

De CovidCheck-System wier de "Schlëssel" fir am Secteur vum Evenementiel nees kënnen opzemaachen, seet de Charles Schroeder. Hie bedauert awer, datt de System net am Privaten agesat ka ginn.

Wien an de leschte sechs Méint de Coronavirus hat, brauch eventuell just eng Impf-Dosis ze kréien, esou den CSMI an engem Avis. Den Experte-Rot recommandéiert ausserdeem Jonker tëscht 12 a 15 Joer ze impfen.

Op hirem Bundesparteidag hunn déi däitsch Gréng sech beim Theema Defense nei positionéiert. Eng Decisioun, déi virum Hannergrond vum méigleche Regéiere getraff gouf, mengt de Matthias Kirsch.

Um G7-Sommet gouf iwwer d'Aféiere vun enger Mindeststeier fir international Grousskonzerner diskutéiert. Esou eng Steierreform kéint fir Exportlänner e gréisseren Impakt hunn, mengt de Jean-Paul Olinger.

D'Lis de Pina huet den Androck, datt Schülerinnen a Schüler, déi virun e Conseil de discipline geruff ginn, a ville Fäll ze séier vun der Schoul verwise ginn. Et wieren nach aner Sanktiounen an edukativ Mesurë virgesinn.

Ouni Mask an ouni d'Anhale vun Distanz einfach op eng Party mat Honnerte Leit goen. Dat ass zanter gëschter nees méiglech. Den Atelier huet d'Akraafttriede vum neie Covid-Gesetz gëschter gefeiert.

"Citizens Unite for Change", d'Plattform mat enger Dosen Organisatiounen, manifestéiert fir de Sujet Klimaschutz ze deconfinéieren. Bis zu 150 Persounen hu participéiert.