Immateriellt Kulturierwen Wat huet de Kleesche mat Dréchemaueren ze dinn?

Am Moment stinn néngTraditiounen op der Lescht vum nationale Patrimoine:

• D'Schueberfouer
• Déi Iechternacher Sprangprëssessioun
• Niklosdag
• D'Lëtzebuerger Haus- a Flouernimm
• D'Hiewanskonscht
• D'Eemaischen
• D'Oktav
• D'Konscht vun den Happeschbléiser
• D'Konscht vum Dréchemauerbauen

Konditioun fir op d'Lëscht vum immaterielle Kulturierwen: Interessegruppe musse sech asetzen

Et solle weider Traditiounen op dës Lëscht kommen, wéi zum Beispill d'Wanderschäferei, d'Konscht vum Brennen, oder d'Klibberen, seet de Patrick Dondelinger. Hie géif momentan an Zesummenaarbecht mat de betraffene Leit kucken, Efforten an déi Richtung ze ënnerhuelen.

Niklosdag a Liichtmëssdag sinn zwou Traditioune mat deene vill Leit Kandheetserënnerunge verbannen. Niklosdag steet op der offizieller Lescht vun eisem nationale Kulturierwen, Liichtmëssdag awer net. Dat géif sech doduerch erklären, datt e Veräin eng Ufro gestallt huet, fir datt Niklosdag op d'Lëscht vum immaterielle Kulturierwe soll kommen. Fir Liichtmëssdag gouf keng entspriechend Ufro gestallt, sou de Patrick Dondelinger vum Kulturministère.

Generell misst ëmmer e Veräin, eng Associatioun oder e Grupp vu Leit de Wëllen äusseren, fir eppes op d'Lëscht vum nationale Patrimoine setzen ze loossen, seet de Patrick Dondelinger.

"Jo, Leit, déi dat als hiert Kulturierwen ugesinn, selwer liewen, an och un aner Generatioune wëlle weiderginn. Et weider vermëttelen als Traditioun, an de Leit erklären ëm wat et do geet. An eben hir Traditioune wëlle mat aneren deelen."

Identitéit, Diversitéit, Kontinuitéit a Kreativitéit sinn e puer vun de Krittären

D'UNESCO-Konventioun vun 2003 iwwer den immaterielle Kulturierwe géif déi néideg Krittären definéieren, wéini eng Traditioun op esou eng Lëscht ka kommen. Fir d'UNESCO ass Kulturierwen eppes dat d'Leit, déi et praktizéieren als hiert Kulturierwen ugesinn.

"Dat ass den éischte Kritär: d'Leit musse selwer soen, dat do ass fir eis eist Ierwen. Mir hunn et kritt, a mir ginn et weider, well et fir eis wäertvoll ass an eis e Gefill vun Identitéit a Kontinuitéit gëtt."

An d'Identitéit wier an deem Fall un Diversitéit, Kontinuitéit a Kreativitéit gekoppelt. "Et ass also eppes, wat sech vu Generatioun zu Generatioun erneiert, am Zesummespill mat der Geschicht mat der Natur a mat der Ëmwelt. Och d'Nohaltegkeet an de Respekt vun de Mënscherechter si wichteg Krittären", sou de Patrick Dondelinger vum Kulturministère.