Zäitëmstellung Schluss mat der Summerzäit?

D'Iddi ass al a gouf a verschiddene Regioune schonn am Éischte Weltkrich agefouert. Deemools wéi haut war d'Argument dofir, d'Auer ze dréien, dat selwecht: Energie spueren, andeems ee méi laang vum Dagesliicht profitéiert. Allerdéngs ass dat zimlech ëmstridden. Etudë weisen, datt méiglecherweis den Energie-Spuer-Effekt gläich Null ass.

Europaparlamentarier stellen Zäitëmstellung a Fro

Zënter, datt et d'Summerzäit gëtt, gëtt driwwer diskutéiert. An net nëmmen am Bistro. D'lescht Woch hunn zu Stroossbuerg eng Partie Deputéiert queescht duerch d'Parteien dozou opgeruff, d'Summerzäit ofzeschafen.

Et géif dofir e staarke Support, seet den tschecheschen Europadeputéierten Pavel Svoboda, de President vun der Parlamentskommissioun, déi zoustänneg fir juristesch Froen ass. Am Parlament beschäftegt sech een Aarbechtsgrupp mat iwwer 70 Deputéiert mam Sujet.

The time has come to stop the biannual clock change #stopclockchange https://t.co/Mm537L00Uh

- Pavel Svoboda (@1PavelSvoboda) October 17, 2017

20 Prozent vun de Leit géifen ënnert der Ëmstellung vun der Auer leiden, sou den Pavel Swoboda. Den tschechesche Chrëschtdemokrat berifft sech op eng rezent Etude vum Recherche-Service vum Parlament. "Déi Energie, déi bei der Luucht agespuert gëtt, gëtt nees fir d'Hëtze verbraucht", seet den Pavel Svoboda. D'Zäitëmstellung hätt just Nodeeler a géif virun allem gesondheetlech Problemer mat sech bréngen.

EU-Kommissioun ënnersicht d'Konsequenze vun der Summerzäit

D'Auerzäit oder vill méi dËmstellung gëtt europäesch geregelt. Et gëtt eng entspriechend EU-Direktiv, déi dofir suergt, datt d'Zäitëmstellungen an der EU koordinéiert ginn. Dës Ëmstellungen hätte grouss Auswierkungen op den Transport- an Energiesecteur, sou eng Spriecherin vun der Kommissioun leschte Freideg.

Et wier een awer am Gaange sech mam Sujet ze befaassen, an d'Fro vun der Summerzäit op der Basis vun de leschten Informatiounen ze ënnersichen, sou d'Mina Andreeva.

Debatten a Polen an a Finnland

Et gëtt effektiv Debatten a verschiddenen EU-Länner. A Polen hu sech bei deem Thema sou guer soss zerstridden Parteien zesummegedoen. Op Initiativ vun der polnescher Bauere-Partei huet virun zwou Wochen eng Majoritéit an enger parlamentarescher Kommissioun dofir gestëmmt, datt d'Summerzäit d'nächst Joer ofgeschaaft gëtt.

A Finnland gëtt et Stëmmen, déi no engem Referendum iwwert d'Summerzäit froen. En Donneschdeg huet d'Transport-Kommissioun am Parlament dofir gestëmmt, datt sech d'Regierung soll aktiv dofir asetzen, datt d'Summerzäit op EU-Niveau ofgeschaaft gëtt.

Och si begrënnen hir Initiativ domat, dat d'Auerëmstellung net gutt vun de Leit verdroe gëtt. A Finnland hate 70.000 Leit eng Petitioun ënnerschriwwen, déi seet, d'Auer sollt an Zukunft net méi ëmgestallt ginn.

Och zu Lëtzebuerg ass d'Auer dréinen een Thema. Mir mussen der Zäit hir Zäit loossen, schreift de Lëtzebuerger Agrarminister Fernand Etgen op Facebook. Hie fënnt, et sollt ee bei der Wanterzäit bleiwen, also d'Auer am Mäerz net ëmstellen. Sollt et zu enger Ännerung an der EU kommen, dierft dat déi gréissten Diskussioun ginn: Nämlech déi, ob een sollt d'Summerzäit oder d'Wanterzäit bäibehalen. Well och do ginn d'Meenungen auserneen.