Tourismus Prett fir an d'Vakanz
Iwwert 15 Fluchgesellschafte fléie vum Findel fort, mat méi wéi 800 Flich d'Woch. 3,6 Millioune Fluchpassagéier huet de Fluchhafen d'lescht Joer gezielt. D'Lëtzebuerger reese gären, an der Tourismusbranche geet et gutt. Inspiratioun fir déi nächst Vakanz konnte sech 29.000 Visiteuren op der Vakanzefoire sichen.
De Choix ass grouss fir an d'Vakanz. Bei méi wéi 120 Stänn a mat knapp 200 Experten aus der Tourismusbranche konnt ee sech iwwer seng nächst Rees informéieren. De Marché boomt, an och Länner déi un Attraktivitéit verluer haten, kommen erëm. Beispillsweis géifen dëst Joer erëm méi Leit an Ägypten, Tunesien oder an d'Tierkei reesen, soen d'Reesorganisateuren.
Verschidden Zorte vun Tourismus
D'Leit géife sech awer och verschidden Zorte vun Tourismus wënschen. Verschidde Reesorganisateuren hu sech op Pauschalreesen a Strand-Tourismus spezialiséiert. Anerer organiséieren Croisièren, um Floss an um Mier. Hei ginn et ënnerschiddlech Trends jee no Altersgrupp.
Déi verschidde Reesorganisateure si sech eens, datt an Zukunft méi en individuellen a perséinlechen Tourismus gefrot wäert sinn. Et wäert och en Tourismus zréck an d'Natur ginn, an Expeditioune wäerten un Attraktivitéit gewannen, mengt de Frank Linster, Direkter vu Voyages Flammang.
Géint Internetportaler ukommen
Et wier wichteg, sech géint déi grouss Internetportaler wieren ze kënnen, ënnersträicht d'LSAP-Staatssekretärin Francine Closener. Dofir géif de Staat déi eenzel Firmen och mat Formatiounen ënnerstëtzen. Si mengt awer, datt d'Betriber gutt op d'Digitaliséierung agestallt sinn.
Och déi verschidde Reesorganisateure maache sech keng Suergen ëm den Internet-Marché. Et wier ee gutt opgestallt, an et kéint ee mat aneren Atoute punkten. Ënner anerem géifen d'Cliente komplett op Lëtzebuergesch betreit ginn, an et kéint een och méi séier reagéieren, zum Beispill bei geopolitesche Konflikter, seet den Alberto Kunkel, Vizepresident vun Luxair Tours.
An der Mediathéik:
LauschterenMéi zum Thema
3,6 Millioune Passagéier
3,6 Millioune Passagéier huet d'Fluchhafebedreiwergesellschaft Luxairport d'lescht Joer gezielt. Lëtzebuerg behaapt domat seng Positioun als Fluchhafe vun der Groussregioun, seet de Commercial Director vu Luxairport.
"Et kritt ee keng zweet Chance"
Si ass eng vun deenen onbeléiftste Politikerinnen. D'Staatssekretärin Francine Closener schwätzt iwwer déi negativ Resultater bei Sondagen. Niewent hirem eegenen Image geet et och ëm dee vum Land.
Problemer an der Vakanz? – "Ëmmer reklaméieren"
D'CLLV (Commission luxembourgeoise des litiges de voyage) hëlleft, wann an der Vakanzenzäit Problemer optauchen. Den Giovanni D'Aria erkläert wat a verschidde Fäll ze maachen ass.
