Muséeën iwwer Bierg an Dall Musée de la Sidérurgie: De Schmelzaarbechter
Zanter Jore sammelt d'Amicale vun de Schëfflenger Kolonien Aarbechtsgeschier, Objeten an Dokumenter mam Zil d'Memoire vun de Schmelzaarbechter oprechtzeerhalen. Bis ufanks 2015 war d'Kollektioun an engem Garage ënnerbruecht, ouni Accès fir de Public. Haut hunn dës Zäitzeien hir Plaz am ale Gebai vum Arbed Site Esch-Schëffleng fonnt a sinn op 110 Quadratmeter ausgestallt.
Wärend 130 Joer huet d'Stolindustrie um 60 Hektar grousse Site vun Esch-Schëffleng Geschicht geschriwwen, eng ronn 2.600 Persounen hunn do geschafft, bis 2012 all Aktivitéit opgehalen huet. Am Musée, deen zu Schëffleng um Site ass, gëtt d'Geschicht gewise virun, wärend a no der Industrialiséierung.
D'Wichtegkeet vum Äerz
Schonn am drëtte Joerhonnert viru Christus hunn d'Kelten dat sougenannte Bounäerz verhitt. D'Gallo-Réimer hu Stollen duerch de Fiels gedriwwen. Dat richtegt Ausmooss vun de Minettsvirkomme gouf awer eréischt 1850 vum Fransous Renaudin entdeckt an dat selwecht Joer hunn d'Bridder Metz sech dru gewot fir Minett an hirem Eecher Betrib ze schmëlzen.
Bis an d'1970er Jore war d'Siderurgie den Haaptpilier vun der Lëtzebuerger Ekonomie. De Gunther Alain a Victor Mierens bedreiwen de Schmelzaarbechtermusée. Am Ufank wier et eng Grupp vun Idealiste gewiescht, déi an de Kolonië gewunnt hunn a sech getraff hu fir e Club ze grënnen, mam Zil perséinlech Saachen aus der Zäit vum Biergbau ze sammelen.
D'Ausstellung wiisst
Reegelméisseg kréie si ugeruff a kréien nei Saache proposéiert. An der Ausstellung fënnt een Objeten, déi d'Leit an de Vestiairen haten, fir hir Hänn ze wäschen, Kaarten, déi gedréckt goufe virum, wärend am nom Krich.
Den Ament lafe grouss Projete fir de Site vun Esch-Schëffleng ze revitaliséieren, e fuschneie Quartier soll bis 2025 entstoen.
An der Mediathéik:
LauschterenMéi zum Thema
Musée National des Mines
1810 war scho gewosst, datt et zu Lasauvage Eisenäerz gëtt. Ronn 100 Joer duerno war Lëtzebuerg an den Top 10 vun den Eisenäerz-Produzenten op der Welt. Am Musée National des Mines gëtt dorun erënnert.
De Lëtzebuerger Fligermusée
Zanter 2012 steet zu Munneref de Lëtzebuerger Fligermusée. Eent vun den Haapttheeme vum Musée ass deen éischte groussen internationale Meeting vun der Fligerei zu Munneref am Joer 1910.
Pompjeesmusée zu Nidderwolz
Hanner dem Pompjeesmusée zu Nidderwolz sti sechs Pensionnairen, déi mat vill Enthusiasmus an Engagement de "Pompjeesmusée an der Géitz" verwierklecht hunn. De Musée erzielt d'Geschicht vum Feier läschen hei am Land.
