Mobilitéit "1000 km Lëtzebuerg" zu Fouss an um Vëlo
Den neien CFL-Guide "1000 km Lëtzebuerg" (och wann et der liicht méi sinn), proposéiert Trëppelweeër a Vëlostoure vu Gare zu Gare. Et ass eng verbessert an erweidert Ausgab am Verglach zu fréieren Ausgaben, baséiert op enger Zesummenaarbecht tëscht dem Wirtschaftsministère - der Direction générale du Tourisme, der CFL an den Éditions Guy Binsfeld.
Zu Lëtzebuerg ginn et ëm déi 5000 Kilometer Trëppel-Weeër. Alleng iwwert de beléifte Mëllerdall-Trail ginn all Joer 80.000 Leit spadséieren. D’Land zielt och 613 km Vëlospisten a bis 2021 soll d’Netz op 838 Kilometer ausgebaut ginn. Deen Ausbau ass der Regierung aacht Milliounen Euro d'Joer wäert.
Fir datt Lëtzebuerg als Touristendestinatioun attraktiv bleift brauch et gutt Infrastrukturen an d’Informatiounen dozou mussen à Jour sinn.
E Guide vu Gare zu Gare
Déi grouss Neierung mam neie Guide ass, datt kee vun den Tier méi en Boucle ass, mee et geet vu Gare zu Gare an zwar a béid Richtungen. All Tour ass mat Kaart, Text-Beschreiwung, Fotoen, Kilometrage an topographescher Duerstellung dokumentéiert.
De Guide, an dräi Sproochen, funktionéiert awer nëmme wann och d’Signalisatioun um Terrain stëmmt. Dofir wier een och op d’Leit ugewisen, déi d’Weeër benotzen, sou d’Francine Closener.
Traditionell oder GPS
Ee Randonneur hëlt wuel nach dacks eng Kaart an de Grapp, déi meescht Cycliste luede sech hir Strecken awer op de GPS.
Méi modern geet awer och: wéi den Thomas Schoos vu Binsfeld erkläert, kéint een ënnert anerem och mat ‘qr-codes’, iwwert de Geoportail, déi genee GPS-Coordonnéeën op den Handy huelen.
Quantitéit oder Qualitéit
Eng Rei Strecke sinn allerdéngs net integral ze befueren. Sou zum Beispill d’Strecke Lëtzebuerg-Iechternach-Waasserbëlleg, op där de Vëloswee tëscht Ernster a Gonneréng zou ass. Zum Deel wiere Gemenge fir d’Maintenance zoustänneg. Fir gréisser Aarbechten wieren et d’Ponts et Chaussées.
Donieft wier et sënnvoll eng Strecke Ëlwen-Ettelbréck ze schafen. Wéi de President vun der Lëtzebuerger Vëlosinitiativ, de Gust Müller erklärt, kéinte Cyclisten, déi vun Oochen op Lëtzebuerg kommen am Moment nämlech zu St. Vith iwwert belsch oder däitsch Velosweeër Lëtzebuerg ëmfueren.
Wier et net méi sënnvoll, iert een d’Vëlosweeër ausbaut, dofir ze suergen, datt déi di bestinn och an der Rei sinn? Op d’Fro, ob Qualitéit net besser wier wéi Quantitéit, äntwert d’Francine Closener “Et ass natierlech ëmmer schued wann esou eppes virkënnt, mee ech mengen déi [Ponts et Chaussées] sinn och bestëmmt dankbar fir en Tipp ze kréien, wéi si dat nach kënnen an Zukunft besser maachen.”
- Den neie Guide fënt een um Internetsite vun den CFL
