Sova Stroj Soundtrack fir de Weltënnergang

Wéi wär et, wann d'Mënsche géifen ophale sech ze reproduzéieren? Där Fro geet de Lëtzebuerger Ambient-Museker Sova Stroj op sengem éischten Album no. D'Resultat ass experimentell awer accessibel.

Yves Stephany

Sova Stroj
Sova Stroj am 100,7-Studio ©Nynewe

"Dreeme muss de Mënsch ëmmer, woufir lieft hie soss?" Dem Michel Flammant säin éischte Solo-Album ass eng poetesch Visioun vun der Apokalyps. D'Enn vun der Mënschheet, vum Mënsch bewosst selwer erbäigefouert: "Ech hu mir iwwerluecht, datt d'Mënschheet enges Daags zu där Erkenntnis kënnt, datt all dee Misär an alles wat si bis elo geleescht huet net sou immens war. An datt si einfach géingen ophale sech ze reproduzéieren."

Well et da keen Drock méi géif gi fir ze wuessen, kéint d'Mënschheet an hire leschten 100 Joer zur Rou kommen. Lues a lues géif d'Äerd dann ëmmer méi roueg ginn. Dohier och den Titel vum Disk: "Silent Earth".

Konzeptuell Approche

Obwuel d'Musek vu Sova Stroj roueg a monoton ass, geléngt et dem Artist, an deene véier laange Kompositiounen eng Narratioun ze vermëttelen. Am Géigesaz zu sengen anere musikalesche Projeten war d'Approche fir Silent Earth konzeptuell. "Ech hat den Album zu 80 Prozent fäerdeg am Kapp. Ech wousst wéi e géint ufänken, wou ech géif higoen a wéi e géif endegen." Och vum Sounddesign hat hie schonn eng ganz konkret Iddi, ier hie mat där eigentlecher Produktioun ugefaang huet.

Produktioun

D'Opname vun de Synthesizere goufe gréisstendeels live realiséiert. Duerno huet de Michel Flammant seng Stëmm, een Akkordeon, eng Kalimba an afrikanesch Rëselen iwwer dës Pisten enregistréiert. Den Artist beschäftegt sech mat ganz komplexe Synthesizer-Systemer. Duerch déi vill potenziell Feelerquelle vu dësen Instrumenter ass d'Resultat net ëmmer previsibel. Am virdefinéierte Kader erlaabt hie sech Feeler an Experimenter. "Dat ass interessant fir mech, well et méi subtil ass. Et ass net einfach fräi. D'Variatioune si méi kleng a fokusséiert."

"Silent Earth" gouf vum Michel Flammant gespillt, opgeholl an ofgemëscht. Fir de Mastering war den Andreas Lubich alias Lupo responsabel. D'Michaela Knizova huet de Cover realiséiert. Den Album koum am Januar 2016 beim belsche Label Testtoon eraus.

Sova Stroj

No sengen éischten Optrëtter als Solo-Artist ass de Feedback gréisstendeels positiv. "Et huet ee gewëssen hypnotesche Charakter, deen ech och bewosst sichen. Ech schaffe vill mat Widderhuelungen a Mikro-Variatiounen a sou Geschichten, fir eng gewëssen Trance ervir ze ruffen."

De Michel Flammant huet seng musikalesch Carrière mat 16 Joer an enger Black Metal Band ugefaang. Duerno huet hie sech mat Rock an Elektro-Pop beschäftegt. Ënner anerem war hien Deel vum Duo "Plantkon Waves". Seng Passioun fir elektronesch Musek huet hie réischt rezent entwéckelt.

Am Juli 2015 war eng Live-Session vu Sova Stroj am grousse Studio vum 100.7. D'Opnam kënnt Dir integral hei lauschteren:


Links
Sova Stroj: http://sovastroj.com/
Testtoon Records: http://testtoon.com/ 
Silent Earth lauschteren a kafen: http://testtoon.bandcamp.com/album/silent-earth
Video vun der E-Lodie Session: https://youtu.be/YiBdzZoY-PQ

An der Mediathéik:

E-Lodie / / Yves Stephany
Lauschteren

Méi zum Thema

chris maas.jpg
Lëtzebuerger Drummer

De Lëtzebuerger Chris Maas ass fräiberuffleche Museker, deen zu London Perkussioun studéiert huet a mëttlerweil mat weltbekannte Bands ënnerwee ass.100,7-Interview mam talentéierte Batteur.

Greg Lamy.jpg
Nei CD vun de Gittariste Greg Lamy a Paulo Simoes

Elektresch an akustesch Gittaren treffen openeen. Ze héiere sinn nei Arrangementer vu Standarde wéi “Insensatez” vum Carlos Jobim oder “Days of Wine & Roses” vum Henry Mancini, an och eege Stécker.

Charel Stoltz.jpg
Musek-Produzent

E groussen Deel vun der Lëtzebuerger Rock- a Pop-Musek gëtt vum Charel Stoltz opgeholl. De Produzent gëtt Ablécker a seng Aarbecht. A schwätzt och iwwer déi psychologesch Komponent vun der Musek.

pit dahm-3.jpg
Pit Dahm Trio

De Pit Dahm Trio schafft u sengem Debut-Album. De Lëtzebuerger Batteur krut dofir zu Diddeleng ee Concerts-Sall zur Verfügung gestallt. De Manuel Ribeiro huet d’Museker bei den Opname begéint.

Programm

Praktesch Infoen

  • 31.5. Schengener Gespréicher

    31.5. Schengener Gespréicher

    D'Pandemie - vum Coronavirus ausgeléist - huet dem Commerce an der Groussregioun grouss finanziell Abousse bruecht. Mëttlerweil sinn d'Geschäfter nees op, mee vun enger ekonomesch gesonder Vitesse de croisière ass een nach wäit ewech.

Dossieren

  • Coronavirus

    Den neiaartege Coronavirus Sars-CoV-2 breet sech ëmmer méi aus. De Virus léist d'Krankheet COVID-19 aus. Wéi eng Mesurë gi geholl, a wéi een Impakt huet en op Lëtzebuerg?

  • Gratis ëffentlechen Transport

    Den ëffentlechen Transport zu Lëtzebuerg ass vum 29. Februar u gratis. Dat haten d'Majoritéitsparteien Enn 2018 esou decidéiert. An eisem Dossier fannt Dir all eis Artikelen zum Theema.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen