Showcase-Festival Shuffle - Den Jazz vibréiert am Neimënster

De Luxembourg Jazz Festival - oder "Shuffle" - ass dee gréissten Jazz-Showcase-Festival am Grand-Duché. En ass als Plattform fir Austausch geduecht, an als Sprangbriet fir d'Kënschtler:innen aus der Lëtzebuerger Jazzzeen.

Marc Clement / cbi

Giovanni Trono a Bob Seyler
Den Giovanni Trono an de Bob Seyler hunn de Showcase-Festival presentéiert

D'Këntschler:innen erwaart d'Geleeënheet hir Kompositioune virun nationalen an internationale Profien aus der Industrie ze spillen, a Renconteren ze maachen, déi deels vum Kulturexportbüro Kultur:LX facilitéiert sinn, fir hinnen hoffentlech d'Diere vum internationale Marché opzemaachen.

Den Dialog tëscht den invitéierte Bands gëtt grouss geschriwwen, an de Public kënnt dobäi op seng Käschten - well dee gëtt mat allem verwinnt, wat zu Lëtzebuerg an doriwwer eraus aktuell a lieweg ass.

"Datt d'Band eng Aktualitéit huet, war eis wichteg", esou de Bob Seyler, dee fir d'Programmatioun vum Festival dat lescht Wuert hat. Esou huet dann och de gréissten Deel vun den Ensembele rezent eng Opnam mat neier Musek erausbruecht, oder steet kuerz virdrun.

Frësche Wand

Et gouf déi Kéier och nach méi staark op den Nowuess gekuckt. Den Trompettist Daniel Migliosi, deen de Festival mat sengem Sextett um Freiden opmécht, ass grad emol 18 Joer al, a LINQ um Samschde gi vum jonke Bassist Mateusz Wojda geleet.

Donieft steet der Claire Parsons hire Chamber-Pop-Projet "The Aquatic Museum" op der Affiche, genee wéi d'Allstar-Band "Tele-Port" (Jeff Herr, Pol Belardi, Jerôme Klein, Zhenya Strigalev), déi de Lien mat der Londoner Jazz-Zeen duerchschénge léisst. Weider Nimm op der Affich sinn Arthur Possing Quartett a Maxime Bender.

Den Jazz gëtt nei entdeckt

Eng kloer Tendenz zur Jazz Fusion, dem Inkorporéiere vun anere Museksstiler an eng Jazz-Approche duerchzitt d'Programmatioun a reflektéiert domat den Zäitgeescht.

Um internationale Plang ass déi mallorkanesch Latin-Jazz-Pianistin Isis Apache Montero ze erliewen, déi mat hirem Sound tëscht Spuenien a Cuba pendelt; "Dishwasher", eng Kraut-Jazz-Band vu Ghent; an den "Neue Grafik Ensemble" vu Parais, deen Jazz mat Dance-Musek verbënnt.


Shuffle - Den Jazz vibréiert am Neimënster: de 25. an de 26. November an der Abtei Neimënster an der Salle Robert Krieps / Salle Nic Klecker. D'Diere ginn um 18h op.

Lauschtert d'Gespréich mam Bob Seyler (Neimënster) an Giovanni Tronno (KulturLX) hei.

An der Mediathéik:

Kultur / / Marc Clement
Lauschteren

Méi zum Thema

Loïc Schlentz
Sot emol

De Loïc Schlentz ass Sänger, Acteur an Dänzer: genee dat, wat ee fir ee Musical braucht. A "Sot emol" erzielt hien, wéi hie mat Musek a Kontakt komm ass, a wéi säi Wee hien op Berlin bruecht huet.

Jérôme Klein
Fënnefvéierel

De Quartett ronderëm de Jérôme Klein beweegt sech weiderhin tëscht Jazz a Pop mat villen introspektiven Harmonien a verflechte Keyboardmusteren. Am Fënnefvéierel gëtt hien en Abléck a säi Kreatiounsprozess.

Net verpassen

Dossieren

  • Chamberwalen 2023

    Am November gëtt zu Lëtzebuerg en neit Parlament gewielt. Kann d'Dräierkoalitioun vun der DP, LSAP an déi gréng weider d'Regierung stellen, oder gëtt et ee Regierungswiessel?

  • Hëtzt & Dréchent

    2022 ass bis elo vun héijen Temperaturen an extreemer Dréchent markéiert. Wéi eng Impakter huet dat op Mënsch an Ëmwelt?

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen