Ryvage presentéiert Tides EP "Meng perséinlechst an intuitiivst Aarbecht"

Den EP "Tides" wier aus der Isolatioun eraus entstanen. "Ech hu mech physesch ofgekapselt", seet de Samuel Reinard. "Generell ass de Prozess als elektronesche Museker souwisou zimlech solitär." Awer hien hätt och bewosst eng Ausernanersetzung mat sech selwer gesicht.

D'Sujeten, déi hie verschafft huet, wiere ganz universell, wéi Gediechtnes, Identitéit oder Zäit. "Mee och de Prinzip vun der Suerg oder vun den Angoissen, déi och haut politesch vill genotzt ginn. A wéi si sech an dengem perséinleche Liewen entfalen."

Et wier déi perséinlechst an intuitiivst Aarbecht, déi hie bis elo gemaach hätt, seet de Samuel Reinard.

Musek als Rees

Ryvage, d'Küst, dat ass fir de Lëtzebuerger Producer ëmmer mat enger Rees verbonnen. "Fir mech ass Musek produzéieren e bësse wéi mech an den Auto setzen an op eng Küst fueren, an dann einfach dat grousst Oppent kucken. Den Infini, deen s de gesäis, wann s de justement den Horziont kucks."

Obwuel den "Tides" aus der Isolatioun eraus entstanen ass, huet de Samuel Reinard e weidere Rework drop gepaakt. Seng Versioun vun engem Sun Glitters Track ass deen drëtte, deen hie verëffentlecht, no Wierker vum Laurent Garnier, Pascal Schumacher an Eyes In My Eyes, déi hien a sengem Studio verschafft huet.

Dat wier ee Wee, fir trotz der Solitude mat anere Leit ze kollaboréieren, seet de Samuel Reinard. "Et hëlleft dir och ze kucken, wéi s du dech par Rapport zu engem aneren Univers Sonore artikuléiere kanns."

Dëse Freideg, de 5. Juli gëtt "Tides" an de Rotonde virgestallt. Niewent Concerte vu Ryvage, Them Lights an Airship 81 gëtt och de Museksvideo zu "Program" eng éischte Kéier gewisen.

De Samuel Reinard am Gespréich mam Yves Stephany

Lauschteren