Noruf Kraftwerk-Matbegrënner gestuerwen

De Florian Schneider ass dout. Als Matbegrënner vum Musek-, Konscht- an Technikprojet Kraftwerk war hien ee vun deenen aflossräichste Popmuseker weltwäit.

Marc Clement / cbi

Florian Schneider
Foto: CC BY-SA 2.0 Daniele Dalledonne

1947 zu Düsseldorf als Jong vun engem berüümten Architekt gebuer, huet hie schonn a jonkem Alter Konscht a Kultur geotemt. A jonke Joren huet hie Gittar, Gei a Querflütt um Conservatoire geléiert. A Coursen ënner dem Karl-Heinz Stockhausen an dem Mauricio Kagel entdeckt hien déi musikalesch Avant-Garde - béid Kënschtler wäerten ee staarken Afloss op hien hunn.

Mam Ralf Rütter, deen hien 1968 kenneléiert, grënnt hien d'Band Organisation, déi am Kader vum deemolege "kosmische Musik"-Mouvement d'Instrumenter vum Jazz, d'Attitüd vum Rock an d'Konzeptualitéit vun der Avant-Garde-Musek matenee verbanne wëllt.

Wärend dëser Aarbecht ass d'Iddi fir de Projet "Kraftwerk" entstanen, deen Numm, ënner deem de Rütter an de Schneider tëschent 1970 an 1973 hir éischt dräi Placken erausbréngen, zesumme mat engem wiesselende Grupp vu Collaborateuren. Düster Hammond-Uergelen, dissonant Crescendoen an Experimenter op der Flütt kennzeechnen zum Beispill den Debut-Album.

De Projet konkretiséiert sech

Mat "Autobahn", hirem 4. Album 1974, konkretiséiert sech ee Konzept, dat Kraftwerk weltwäit zu deenen aflossräichste Populariséierer vun elektronescher Musek maache wäert. D'Musek ass fir d'éischte Kéier ganz ouni akustesch Instrumenter opgeholl, eng Première am Pop-Beräich.

An akribescher Studioaarbecht setze si Synthesizer-Kläng zu bewosst plakativen, konzeptaartege Plagen zesummen, déi op thematescher a rhythmescher Widderhuelung baséieren. D'Resultat ass net nëmmen hypnotesch a bis dohin ongehéiert Musek, mee och den Ufank vun enger intelligenter Ausernanersetzung mat der Gesellschaftsstruktur vum Nokrichseuropa, déi d'Band iwwer Joerzéngte wäert weiderféieren.

Am Zentrum steet déi sougenannte Mensch-Maschine, den Homo technologicus, deen d'Qualitéite vun där Technik, déi hie benotzt, verënnerlecht. Spéider Placke wéi "Radioaktivität" oder "Computerwelt" gehéieren haut zum Kanon vun der elektronescher Musek.

Ee groussen Afloss

Kraftwerk waren awer och een tatsächleche Konschtprojet, an deem Elementer vu Performance, Massemedien a Gesellschaftskritik (an engem ganz neutrale Sënn) zu engem staarke Ganzen zesummefonnt hunn. Vun 1998 un enseignéiert de Schneider op der Konschthéichschoul zu Karlsruhe a verléisst Kraftwerk, déi kaum nach nei Musek erausbréngen, mee nach Live-Concerte spillen, schläichend vun 2006 un, an 2009 definitiv.

Et ass net iwwerdriwwen ze soen, datt Museksgenrë wéi Techno, Hip-Hop oder House haut net géifen existéieren, hätte Kraftwerk net op hir Muse gelauschtert. Säin Entourage gëtt als Doudesursaach ee séier verlafende Kriibs un, de Florian Schneider ass 73 Joer al ginn.

An der Mediathéik:

Kultur / / Marc Clement
Lauschteren

Méi zum Thema

Kraftwerk 1981 zu Hamburg
Computerwelt

D'Band Kraftwerk war hirer Zäit viraus. Um Album "Computerwelt" hu si sech 1981 mat Sujete wéi Big Data, Iwwerwaachung an online-Dating beschäftegt. Si hunn d'Welt verännert a beaflossen d'Musek bis haut.

Net verpassen

Programm

Dossieren

  • Dossier: Relatiounen tëscht Portugal a Lëtzebuerg

    Haut ass et den zweeten a leschten Dag vun der Staatsvisitt a Portugal. Eng grouss Lëtzebuerger Delegatioun ass den Ament zu Lissabon. An eisem Dossier fannt dir all eis Bäiträg an Artikelen iwwer d'Theema.

  • De Krich an der Ukrain

    De 24. Februar 2022 huet Russland d'Ukrain militäresch iwwerfall. Déi westlech Länner hu mat Sanktioune reagéiert, Millioune vu Leit sinn aus der Ukrain geflücht.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen