Kaitlyn Aurelia Smith - Let's Turn It Into Sound Kanteg Beats a Stëmmkaskaden

Mat "Let's Turn It Into Sound" presentéiert déi amerikanesch Synthiekënschtlerin Kaitlyn Aurelia Smith en iwwerraschend Beat-orientéierten Album, dee virun allem duerch der Musekerin hir duuss Stëmm an eng melodesch Kakophonie bestécht. De Max Tholl huet eragelauschtert.

Max Tholl / cbi

Kaitlyn Aurelia Smith
Foto: kaitlynaureliasmith.com

De leschte Studioalbum vun der Kaitlyn Aurelia Smith läit iwwer zwee Joer zeréck. Am Mee 2020, also an den Ufanksdeeg vu globaler Pandemie a Lockdown, koum "The Mosaic of Transformation" eraus.

An dëse rouegen Disk war eigentlech déi perfekt Begleetmusek fir eben déi pandemiebedéngten Transformatioun an Entschleunegung.

D'Kaitlyn Aurelia Smith huet duerchaus een Hang zu enger gewësser New-Age-Spiritualitéit, si huet och scho Musek fir eng Meditatiounsapp komponéiert an een Album mam Titel "Tides: Music for Meditation and Yoga" erausbruecht.

An och de leschten Album mat senge kaleidoskopeschen an onopgereegte Synthiearrangementer war Balsam fir déi strapazéiert Lockdownséil.

Abrupt an dissonant Rhythmus- an Tounwiessel

Ëmsou méi iwwerraschend kléngt elo "Let's Turn It Into Sound", eng Ping-Pong Kakophonie, déi mat Zäiten iwwerfuerdernd awer ni underwhelming ass.

Anescht wéi op de Virgängeralbe léisst d'Kaitlyn Aurelia Smith de Synthesizerkläng kee Fräiraum fir sech ze entfalen, villméi ass den neien Disk vun abrupten an immens dissonante Rhythmus- an Tounwiessel gepräägt.

Knapp huet een sech un eng Melodie gewinnt, geheit d'Kaitlyn Aurelia Smith een direkt nees an déi nächst Klanglandschaft eran.

De Song "There is something" zum Beispill fänkt mat rouegen Uergelkläng un, éier dës vu kantege Beats ofgeléist ginn. Iwwerhaapt ass et schwéier "Let's Turn It Into Sound" engem spezifesche Genre zouzeuerdnen, well hei Aflëss ewéi Afrobeat, Hyperpop, Glitch Techno, Ambient, Break Beat, Hip- Hop an nach vill méi openeen treffen a matenee verschmëlzen.

Modulär Synthien dominéieren

Wat sech awer bei allem Chaos wéi e roude Fuedem duerch den Album zitt, ass der Smith hier Stëmm, déi mol a ganze Sätz, mol als réng Tounkaskaden duerch d'Lidder fléisst.

Obwuel um Album divers Instrumenter ewéi Saxophon, Flute an aner Blosinstrumenter ze héiere sinn, ass et de Klang vu moduläre Synthesizer, deen hei dominéiert.

Kee Wonner, schliisslech ass d'Kaitlyn Aurealia Smith mat hire Synthiekompositioune bekannt ginn. Ugefaangen huet alles mat engem sougenannte Buchla Synthesizer, deen si sech no hirer Ausbildung um renomméierte Berklee College of Music vun hirem Noper ausgeléint hat.

Si selwer seet, datt si am léifste mat Buchla Synthesizer schafft, well dës sou onberechenbar sinn, an et fir glécklech Accidenter am Studio suergt.

Natierlech gouf d'Smith dowéinst och scho fréi mat der legendärer Synthiekomponistin Suzanne Ciani verglach, mat där si 2016 dann och en Album opgeholl huet.

"Let's Turn It Into Sound" weist elo déi ganz Bandbreet vun der Kaitlyn Aurelia Smith hirem Talent an ënnersträicht hire Ruff als experimentell a facettëräich Kënschtlerin bei där een sech op dat Onerwaarte gefaast maache sollt.


An der Mediathéik:

Kultur / / Max Tholl
Lauschteren

Méi zum Thema

Hot Chip - Freakout Release
Hot Chip - Freakout Release

Déi nei Studioplack "Freakout/Release" vun Hot Chip ass déi aacht an enger räicher Diskographie. En interessante Moment an enger Karriär, an eng super Plack, fënnt de Marc Clement.

Albumcover: "Florist" vu "Florist"
An der Gebuergenheet vun de Bandkolleegen

Mat hirem véierten Album melle sech d'New Yorker Indiefolker Florist zeréck. Et ass ee couragéierte Virstouss an déi eege Vulnerabilitéit.

Net verpassen

Programm

Dossieren

  • Alles iwwer de Podcast Schlechte Schüler

    An eisem Dossier fannt dir sämtlech Episode vun eisem Podcast Schlechte Schüler, Interviewe mat Schoulexperten an déi komplett Transkripter vun den eenzelnen Episoden.

  • Chamberwalen 2023

    Den 8. Oktober gëtt zu Lëtzebuerg en neit Parlament gewielt. Kann d'Dräierkoalitioun vun der DP, LSAP an déi gréng weider d'Regierung stellen, oder gëtt et ee Regierungswiessel?

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen