Album vun der Woch Ice In My Eyes - New Romantic

Déi nei Plack vun der Lëtzebuerger Formatioun "Ice In My Eyes" liwwert agängeg Refrainen a kierperlech Rhythmen fir spéit bis an d'Nuecht ofzerocken. Mat Stuerm an Drang zitt d'Quintett een zeréck an d'80er.

Jamie Reinert / tt

Ice In My Eyes (Christian Wilmes).jpg

"E Pop gedriwwent Hookline Krichschëff" - esou gëtt engem den neien "Ice In My Eyes" Album am Presse-Communiqué verkaf. Eng Beschreiwung, déi sech beim lauschteren och iergendwéi verwierklecht.

Mat Stuerm an Drang zitt d'Quintett een zeréck an d'80er an invitéiert dobäi op eng ganz melodiés a maximalistesch Pop-Experienz, déi een net kal léisst. D'Band, déi zanter 2012 ënnerwee ass hëllt déi Kéier méi aus a gëtt hiren agängege Kompositioune méi Déift a méi Opulenz.

Eng Panoplie vun Elementer

U séisse syntheteschen Kläng gouf net gespuert. Déi analog Apparater pompelen a pulséieren, d'Bäss ginn déif an de Bauch, eng schaarf Gittar schléngelt sech melodiéis doruechter an op e puer Stécker kommen engem esouguer Sträicher am Mix entgéint. Eng Panoplie vun Elementer déi dense an dach kohärent cohabitéieren.

"New Romantic" gouf wéi virrecht "Ice In My Eyes" Releasen vum däitsche Museker Jan Kerscher opgeholl a produzéiert. D'Arbecht kléngt fokusséiert a präzis, gedriwwe vun epeschen Refrainen, déi op "Bye", "Chromosome" oder "Arpeggiator" esouguer Stadiumrock-Alluren unhuelen, a laang nom lauschteren am Kapp hänke bleiwen.

E bëssen New Wave, e bëssen Robert Smith

"New Romantic" ass en Titel, dee mat enger Prise Ironie ze genéissen ass. Et kann een natierlech e Verglach mat musikalesche Synth-Pop New Wave Mouvementer aus den 80er zéien. Mee mam Geschminks an der ganzer Fues-Verkleedung huet "Ice In My Eyes" definitiv näischt um Hutt.

Dat gesot sinn déi néng Lidder an hirer Essenz zimmlech glamouréis a gezéckert. Zemools dem Olivier Treinen seng Vocal-Performance dréit eppes vu Robert Smith, David Bowie, awer och David Sylvian. Seng Gesangsmelodien fléien engem mol fléissend, mol méi rhythmesch aventuréis an d'Ouer.

Vun intensiv op besënnlech gëtt vill Terrain gedeckt. Dat Ganzt ënnerstëtzt vun enger dynamescher Band-Performance, déi zur Beweegung opfuerdert. "Ice In My Eyes" sinn op alle Fall keng statesch Band. Si hunn hiren musikaleschen Horizont erweidert a liwwere mat "New Romantic" e kierperleche Pop Opus, deen an dëse Pandemie Transitiounszäiten méi wéi wëllkomm ass.

An der Mediathéik:

Album vun der Woch / / Jamie Reinert
Lauschteren

Méi zum Thema

Ice In My Eyes
Release-Concert e Freideg

Dëse Freideg kënnt den neien Album vun Ice In My Eyes eraus. Hir Lidder sprenge gär d'Format vum Popsong, sinn awer ëmmer danzbar. All Parallellen zu britteschem 80's New Wave si rengen Zoufall.

Claire Laffut
Claire Laffut - Bleu

D'Claire Laffut huet hiren Debutalbum erausbruecht. "Bleu" geet vun Indie bis Dance-Pop, mat Perkussiounselementer a kloer feministeschen Aussoen an ass eng Rees duerch d'Karriär vun der Musekerin.

Net verpassen

Programm

Dossieren

  • Saint-Malo: "Étonnnants Voyageurs"

    Saint-Malo ass déi Plaz, wou déi sougenannt ''littérature-monde'' gefeiert gëtt. Den 100,7 war bei der leschter Editioun vum Festival Étonnants Voyageurs am Juni dobäi.

  • Dossier: Cannabis-Legalisatioun

    Nach am Laf vun dësem Joer soll e legale Kader ausgeschafft ginn, fir e staatlech kontrolléierten Ubau vu Cannabis fir medezinesch Zwecker zu Lëtzebuerg méiglech ze maachen.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen