Als klenge Gebuertsdagscadeau fir de Bach hu mir den Jingle vun der Klassik-Emissioun Resonanzen zu enger Mini-Fuge ëmkomponéiert.
Mat iwwer 1.000 Wierker ass de Johann Sebastian Bach ee vun deene gréisste Personnagen aus der Museksgeschicht. Mä wie war hien eigentlech? A wat si seng bekanntste Stécker?
Fir méi iwwert de Bach gewuer ze ginn, hu mir ënner anerem am Anekdote-Buch "Tasten, Töne und Tumulte" vum Rainer Schmitz a Benno Ure gebliedert.
Dem Bach säi Gebuertsdag gëtt hei zu Lëtzebuerg mat enger ganzer Rëtsch Concerte gefeiert. Wéi eng dat sinn, a wou déi ze héiere sinn, verzielt den Arend Herold, den Direkter vum Institut Européen de Chant Choral Luxembourg.
De Lëtzebuerger Vokalensembel Duke's Singers prouft grad u sengem neie Programm. Op der Affiche stinn ënner anerem déi zwee Choräl "Es ist genug" an "O Welt, sieh hier dein Leben".
No der Prouf hu mir mam Duke's Singer Claude Kraus geschwat
"Seine Musik ist einfach zeitlos.", seet den englesche Popsänger Sting iwwer de Bach. Manner elegant dréckt sech den Albert Einstein aus: "Was ich zu Bach's Lebenswerk zu sagen habe: Hören, spielen, lieben, verehren und - das Maul halten!"
Wéi ee Standing huet de Bach haut? Fir eng Äntwert dorobber ze fannen, si mir op Ettelbréck an de Conservatoire du Nord gefuer an hu mam Jeannot Sanavia iwwer seng Vue als Komponist op de Johann Sebastian Bach geschwat.
Fir d'Vue vun engem Concertshaus-Direkter gewuer ze ginn, hu mir mam Carl Adalseinsson vum Centre des Arts Pluriels geschwat. Ugefaange mat der Fro, wéi präsent de Bach haut nach an der Concertszeen ass.
No all dëse Bäiträg an Informatiounen bleift eis just nach eppes iwwereg ze soen: Alles Guddes fir de Gebuertsdag, Johann Sebastian Bach.
