Dieter Birr Eng Maschinn mat Danzmusek-Studium

An de 1970er Joere war den Dieter Birr mat senger Band Pudhys zu Lëtzebuerg. Iwwer 45 Joer laang stoung hie mat där Formatioun op der Bühn. Elo ass et eriwwer. Oder bal: D’Pudhys ginn nach zesumme mat deenen aneren DDR-Gruppe City a Karat e puer Concerten am Kontext vun hirer "Legenden-Tour". Mä duerno ass definitiv Schluss.

Mam Auto op de Concert

"Musek ass eisen Hobby an eis Leidenschaft. Wa mir op der Bühn sinn, da gi mir ëmmer 110 Prozent" seet den Dieter Birr. D'Leidenschaft géif ni noloossen. An och d'Opreegung net: "Et ass ëmmer nees nei. Et ass ëmmer schéin, virun de Public ze kommen an ze mierken, datt een d'Léit péckt."

D'Rezept, firwat d'Pudhys sou laang zesumme konnten als Kollektiv funktionéieren, ass dem Sänger senger Meenung no ganz einfach: Si fueren all eenzel mat hirem Privatauto op d'Concerten a gesi sech just op der Bühn an am Proufsall. Et gouf ni Stress am Tourbus.

Solo-Projeten

Niewent de Pudhys huet den Dieter Birr och eege Projeten. Rezent koum säin zweete Solo-Album "Maschine" eraus. "Ech wollt Fräiraum fir mech hunn a wollt mat anere Museker zesumme spillen. Doduerch kritt ee vill Inspiratioun." Deen drëtten Album wär fir September geplangt. Genee wéi op "Maschine" sinn eng Rëtsch Gäscht mat dobäi. Dorënner den Heinz Rudolf Kuntze.

Den Dieter Birr huet eng aner Approche zu Texter, well hien eben an engem Land musikalesch grouss ginn ass, der Ex-DDR, wou een an den Texter vill méi tëscht den Zeilen huet musse schreiwen.

Diploméierten Danzmuseker

Den Dieter Birr, deen 1944 zu Kösslin a Pommern gebuer gouf, war à l’Origine Handwierker. Hien huet an der DDR Universalschläifer geléiert, huet sech dernieft autodidaktesch Gittar bäibruecht, a spéider Danzmusek studéiert.

"An der DDR huet ee missen eng Ausbildung hunn, wann een als Museker wollt schaffen," erkläert den Dieter Birr. Nodréiglech fënnt hien et awer besser, ee Beruff ze léieren an niewebäi Musek ze maachen. "D'Beatles an d'Stones hunn och keng musikalesch Ausbildung gemaach, an hu souzesoen d'Welt mat hirer Musek revolutionnéiert."