Klassik CD-Tipp: "Excursions" vum Teo Gheorghiu Een Talent aus der Schwäiz

Zanter sengem Debut 2004 an der Tonhalle zu Zürich huet dee Schwäizer Pianist Teo Gheorghiu sech lues awer sécher op der internationaler Musekszeen etabléiert – spéitstens no der Publikatioun vun der Debut-CD bei Deutsche Grammophon. Deemools huet en Schumann a Beethoven opgeholl. De Gheorghiu schéngt eng romantesch Oder ze hunn, well och op deem rezenten Disque proposéiert en Pianosliteratur aus dem 19. Jorhonnert. De Guy Engels huet d'CD gelauschtert. 

Teo Gheorghiu.jpg
©Teo Gheorghiu

Den Teo Gheorghiu gräift de romanteschen Topos vum Wanderer op a verpaakt en an deem kommerziell méi attraktiven Titel „Excursions“. Dat sinn awer déi eenzeg Konzessiounen, déi de Pianist mat de rumäneschen Originen un de Marketing mécht. Obschonns de Gheorghiu eréischt 23 Joer huet, ass e scho längst aus der musikalescher Pubertéit eraus.

Kee romantescht „Stürmen und Drängen“, keen onrouegt Wandere schläicht sech a seng Interpretatiounen. De Gheorghiu ass een Introvertéierten, de Wanderer, dee verlaangert, dee sicht an onsécher ass. Dat Ganzt presentéiert de Pianist mat kräftegem, romantesche Klang. Am Franz Schubert sengen Impromptus geet de Gheorghiu éischter Stëmmungen no, schaaft Atmosphäre an enger Musek, déi vill méi Reflektioun ewéi Ausdrock ass.

 

Zwee Liszt-Wierker

D'Lecture vum Liszt sengen Années de Pèlerinage si verdreemten, romantesch  Schwärmereien an der Vallée d’Obermann. Um Enn vum Programm steet dann nach eng ganz lieweg, frësch Prestatioun vum Liszt senger Orchesterversioun vun der Schubertscher „Wandererfantaisie“. Hei kann den Teo Gheorghiu sech op déi sécher Begleedung vum Douglas Boyd an dem Musikkollegium Wintherthur verloossen. De Franz Liszt, selwer een Tastenhengscht, wollt aus dësem Wierk kee Virtuosestéck maachen, an den Teo Gheorghiu léist sech och net drop an, fir um Piano ze paradéieren, mee spillt d’Wierk mat der néideger Sensibilitéit.

Méi zum Thema

sfsmedia_adams__cover[1].jpeg
Klassik CD-Tipp: Absolute Jest / Grand Pianola Music

Et spiert een däitlech, datt de Michael Tilson Thomas a säi San Francisco Symphony Orchestra beschtens mam John Adams senger Musek vertraut sinn.

 

Net verpassen

Dossieren

  • Klimakonferenz zu Glasgow

    Déi gréissten Weltklimakonferenz zanter Paräis fënnt tëscht dem 31. Oktober an 12. November zu Glasgow statt. Fir eis op der Plaz ass eise Korrespondent Philip Crowther.

  • Verfassungsreform

    D'Verfassung vun 1868 soll duerch eng nei Verfassung ersat ginn. 2009 gouf dëse Reformprozess formell lancéiert an nach ass d'Aarbecht net ofgeschloss. Et ass nach e Referendum iwwer den neien Text geplangt.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen