Art Feynman - Half Price at 3​:​30 De Meeschter vu fléissender Klangmanipulatioun

Wann hien den Numm Art Feynman unhëlt, gëtt den amerikanesche Folkmuseker Luke Temple zum Guerilla Recorder, liest een op der Säit vu sengem Label Western Vinyl. Een deen op eege Fauscht Musek mécht, also, dee mat klenge Waffe kämpft, an op speziellem Terrain.

Marc Clement / cbi

Art Feynman

Op der neier Plack "Half Price at 3:30", dem Amerikaner senger drëtter ënner dësem Numm, ass hien allerdéngs op sengem eegene Wee. Datt trotz allen Experimenter an Ongewéinlechkeeten dach accessibele Pop derbäi erauskënnt - scheinbar onverhofft - huet him de Verglach mat Aussesäiter wéi Arthur Russell oder Harry Nilsson abruecht.

Beim Beschreiwe vum Luke Temple alias Art Feynman eng Hellewull aner Museker ze namedroppen, ass hoffentlech just op d'Raritéit vun esouvill Eegenaart zeréckzeféieren - well hie kléngt net, wéi dës aner Museker.

Als Art Feynman leet de Luke Temple de Minimalismus vum Folk of a mécht sech dem Orchestralen a Syntheteschen op.

Schonn "The Secret Life of Marylin", deem Track, dee virun zwee Méint d'Erauskomme vun der neier Art Feynman Plack annoncéiert hat, huet de Feynman/Temple als Meeschter vu fléissender Klangmanipulatioun ausgezeechent.

De Vocal schafft mat duebeler Expressioun, eng am Moment vum Take, an eng zweet, déi mat elektroneschem Pitch agräift, fir eng Aart schwiewende Stëmmsolo an der Mëtt vum Track ze schafen. D'Melodie gëtt da spéider vun engem Flütteklang weidergedroen, dee ganz tatsächlech net vun dëser Welt ass, an hallef digital Originne matbréngt.

Drumcomputere lafen hannendrun - wéi bei de Cars - melancholesch an dreiwend hire Wee, a melodesch Linnen treffe sech op déi glécklechst Aart a Weisen, wéi wann et en Zoufall gewiescht wier. Polyrhythmie ass de Schlëssel. Et ass schéin, wéi d'Songs op dëser Plack d'Spuere vun hirem Zesummekomme verstoppen. Arrangement a Kompositioun, d'Linn an hire Sound verschmëlzen a ginn eent.

Den Album beweist Finess an all Couchë vu sengem Entstoen: de Songwriting, scheinbar bäileefeg mee mat wellenaarteg opschaimenden Héichpunkter; d'Gittaropnamen a Stëmm-Takes, déi vu bréckeleg a fragil bis staark a resonant goe kënnen; den digitalen Agrëff an dës charmant Opnamen op bedeitungsvoll a verstäerkend Aart a Weis; Bass a Keyboardlinnen, déi sech anenee verstrécke wéi Verléifter.

Den Temple zitt och op dëser Plack den Hutt viru senge musikalesche Léiften, dem afrikaneschen Highlife an dem Art-Pop, ouni seng eegen Atmosphär jeemools ze briechen. Wou d'Debut-Plack nach hei an do am Pastiche Begraff war, ass "Half Price at 3:30" esou treffsécher am Schafe vun Atmosphären, datt een déif vergruewenen Drama aus der scheinbar roueger Musek ervirschéngt. Genee dat Richtegt ... fir d'Luucht- a Schiedspiller vum Summer.

An der Mediathéik:

Album vun der Woch / / Marc Clement
Lauschteren

Méi zum Thema

Jessy Lanza - All The Time
Jessy Lanza - All The Time

Fir den Album vun der Woch geet et déi Kéier op d'Danzfläch. Dëse Freideg bréngt nämlech d'Kanadierin Jessy Lanza hir drëtt Plack "All The Time" eraus, an den Jamie Reinert ass vun hirem intelligente Pop begeeschtert.

Arca
Arca - KiCk i

D'Kënschtlerin Arca ass als Produzentin hanner Stars ewéi Björk, Kanye West. Mat "KicK i" presentéiert si lo hire chaotesche Popentworf, dee vun haardem Reggaeton bis schmalzege Balladenmusikalesch alles ofdeckt.

Programm

Net verpassen

  • AutorInne-Lies

    Autorinnelies final

    Autorinnen an Auteuren doheem akustesch agefaangen. 

Dossieren

  • #beethoven20

    De Jean Muller gëtt an 32 Episoden en déiwen Abléck an de Kosmos vum Ludwig van Beethoven senge Pianossonaten.

  • Coronavirus

    Den neiaartege Coronavirus Sars-CoV-2 breet sech ëmmer méi aus. De Virus léist d'Krankheet COVID-19 aus. Wéi eng Mesurë gi geholl, a wéi een Impakt huet en op Lëtzebuerg?

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen