Wäiss a Schwaarz David Ianni
Mat 16 Joer hëlt den David Ianni d'Decisioun Komponist wëllen ze ginn. Den Ausléiser dofir war säi Stéck "Night of Tears", an deem hien eng traureg Erfarung positiv verschafft huet. An der Emissioun Wäiss a Schwaarz gëtt den David Ianni en Abléck an dës Decisioun an an d'Hannergrënn, déi hien zu weidere Stécker geféiert hunn. Gläichzäiteg interpretéiert hie verschidde vu senge Wierker um Fligel a retracéiert mat Tounbeispiller seng kompositoresch Iddien. Um Programm stinn nieft "Night of Tears" och d'Stécker "Forever", "Lamento", "Adieu" an "Timelessness".
2016 schreift den David Ianni "Timelessness". An dësem Stéck dréckt hien dat Éiwegt, eng onendlech Rou déi am Hannergrond matschwéngt musikalesch aus. Entstanen ass "Timelessness" an enger Zäit an där de Komponist op där enger Säit iwwer Museksvideoen op Social media an den direkte Kontakt mat sengen Nolauschterer getrueden ass, op där anerer Säit awer och eng Partie Projeten an d'Waasser gefall sinn.
"Dat sinn déi Geschichten, déi een esou dobaussen natierlech net matkritt. Um Radio zielen ech net, wat alles net geklappt huet, awer ech kann Iech soen, et klappt méi net wéi, wéi datt et klappt, hunn ech heiansdo den Androck."
D'Decisioun Komponist ze ginn hëlt den David Ianni am Alter vu 16 Joer. Zwar hätt hien och schonn als Kand scho Musek geschriwwen, allerdéngs wier hien der Opfaassung gewiescht, datt seng Musek ze tonal fir eng Zäitgenëssesch Kompositioun wier. No de Reaktiounen, déi hien op säi Stéck "Night of Tears" kritt huet, hätt hie schlussendlech decidéiert méi an d'Richtung vun der Kompositioun ze goen. Entstanen ass "Night of Tears" nodeems seng éischt grouss Léift an d'Bréch gaangen ass. Erauskomm ass eng Kompositioun mat enger Approche, déi sech och a senge spéidere Wierker ëmmer erëm spigelt.
"Ech mengen dat ass och oft bei menge Museksstécker esou, datt déi zwar duerch en trauregt Evenement inspiréiert gi sinn an och op d'éischt Lauschtere vläicht traureg wierken am Endeffekt awer ëmmer voller Hoffnung schwéngen. Well ech hunn et jo net geschriwwen, fir mech selwer ze bedaueren, mee fir mech erauszehuelen aus där traureger Stëmmung."
