Because Music Matters D'Erausfuerderung vum distanzéierte Live-Concert
Bis zu 1.000 Leit sollen um Concert vum Serge Tonnar an der Rockhal den 21. Mee deelhuelen. D'Concertsserie "Because Music Matters" leeft an Zesummenaarbecht mat der Santé. D'Dr. Anne Vergison gëtt een éischten Abléck an d'Resultater, déi bis elo erziilt goufen.
Haut an enger Woch ass an der Rockhal een éischte Concert, bei deem bis zu 1.000 Leit am Publikum zougelooss sinn. D'Preparative fir dëse Pilotprojet lafen an Zesummenaarbecht mat der Santé, déi op Erfarunge vun enger éischter Test-Serie vu méi klenge Concerten am Februar baut.
Virgesinn ass, datt d'Spectateure virum Concert getest ginn an och eng Zäit duerno nach eemol. Bannent der Rockhal si speziell Signalisatioune fir d'Zirkulatioun virgesinn. De Concert wäert am Sëtze sinn, d'Droe vum Mask wäert obligatoresch sinn a Gedrénks wäert keent verkaaft ginn.
Am Hibléck op gréisser Live-Evenementer an der Kultur oder am Sport mat gréisstméiglecher Sécherheet organiséieren ze kënnen, schafft d'Inspection sanitaire un dëse Pilotconcerte mat. D'Dr. Anne Vergison ass responsabel fir d'Berodung am Ausschaffe vun de Sécherheetsmesuren, wéi och d'Auswäertung vun den Observatiounen, déi bei de Pilotconcerte gemaach ginn.
Am Gespréich mam Marc Clement gëtt si Detailer zu hirer Aarbecht - an erkläert fir d'éischt, wéi eng Resultater déi éischt Pilotconcerten am Februar bruecht hunn.
An der Mediathéik:
LauschterenMéi zum Thema
Siren's Call ëm ee Joer verréckelt
De Festival Siren's Call ass wéinst der Pandemie fir dëst Joer ofgesot an ëm ee Joer verréckelt. Dat hunn d'Organisateure vum Concertshaus Atelier de Moie matgedeelt. Neie Rendezvous ass den 25. Juni 2022.
Eischt Concerten an der Rockhal zanter Pandemie-Ufank
Eng Serie Concerten an der Rockhal, vun haut bis e Samschdeg, soll als Observatiounsgeleeënheet fir d'Behuele vum Covid-19 am Kontext vu Live-Evenementer déngen.
