Leit, déi gär danzen Cluttered Clarity sichen de Wee vum Jazz an de Pop
Op hirer neier Single "Save It All" verbanne Cluttered Clarity Pop-Songwriting mat Improvisatioun an elektroneschen Tonalitéiten. D'Formatioun ronderëm de Lëtzebuerger Vibraphonist Ben Konen huet grouss Ambitiounen.
Am Museksbusiness muss ee permanent nei Saache bréngen, virun allem wann een eng onbekannt Grupp ass, seet de Ben Konen. Cluttered Clarity wéilt elo all zwee bis dräi Méint eng Single erausbréngen, fir méi reegelméisseg mat de Medien a mat de soziale Medien a Kontakt ze sinn.
Den Debut "Follow Your Dreams" koum am Juli 2017 eraus. Déi nei Single heescht "Save It All". Déi wier duerchaus autobiografesch, seet de Rémy Labbé, deen zweete Kapp vun der Band. Et géif ëm eng Trennung goen, an datt een heiansdo misst hefteg Decisiounen huele fir am Liewe weiderzekommen.
Et schéngt sech heibäi momentan ëm eng Zort Leitmotiv bei Cluttered Clarity ze handelen. "Déi nächst Single ass iwwer meng lescht Bezéiung, wéi déi Schluss gaangen ass", seet de Ben Konen. Hien hätt éischter wéilte Carrière maachen, a seng Frëndin hätt eng Famill wéilte grënnen. Seng Ambitioun wier et, fir enges Daags kënne vum Projet Cluttered Clarity ze liewen.
Kennegeléiert hunn déi zwee Museker sech zu Boston um Berklee College of Music. Duerno ware si allebéid zu New York, éier de Ben Konen 2016 zeréck op Lëtzebuerg koum.
De Ben ass Perkussionist, säin Haaptinstrument ass de Vibraphon. A leschter Zäit interesséiert hie sech och fir elektronesch Musek, wat een däitlech un där neier Single héiert. De Belsch Rémy Labbé ass Trompettist a lieft virun allem vu senge Kompositiounen an Arrangementer
D'Equipe ronderëm si ass variabel. Zwee quasi fest Membere wieren awer de Bassist Tom Heck an d'Sängerin Sitta Foer.
Déi zwee Museker hunn also e Background am Jazz, wëlle mat Cluttered Clarity awer méi an de Pop virdréngen. "D'Musek ass sou, wéi mir liewen. Mir sinn oppe Leit, déi gär danzen, déi gär erausginn." D'Texter wieren hinne wichteg, seet de Ben Konen. Awer et géif och ëmmer nees Improvisatioun an de Stécker virkommen. Do géifen hir Studien an d'Léift zur Musek zum Virschäi kommen.
An der Mediathéik:
LauschterenMéi zum Thema
Dem Napoleon Gold seng waakreg Dreem
"Sunset Motel" wäert dem Napoleon Gold seng nei Plack heeschen, déi am Hierscht erauskënnt. De Sunset Motel, dat ass déi imaginär Plaz, an déi sech de Museker zeréckzéie geet, wann d'Aen erëm eng Kéier net zoufale wëllen.
The Young Lions - Den Nowuess am Jazz zu Lëtzebuerg
De Batteur Luca Pedana an de Gittarist Etienne Grüness zielen zu der neier Gard vun der Lëtzebuerger Jazz-Zeen. Si si knapps mam Lycée fäerdeg a wëllen an d'Ausland Jazz studéiere goen.
D'Sitta presentéiert "Part Of Me"
D'Sitta verbënnt op hirem éischte Solo EP persesch Kläng mat westlechem Pop. "Part Of Me" ass eng Sich no Identitéit an eng Exploratioun vun hiren iranesche Wuerzelen. E Mëttwoch stellt si hiert Wierk vir.
De Ben Konen op Besuch zu Washington
De Lëtzebuerger Jazz-Museker Ben Konen lieft zu New York, an huet zu Boston um berühmte Berklee College of Music studéiert. Hie war mat sengem Vibraphon zu Washington an der Ambassade op Besuch.
