Congés Annulés Bobby Bieles mixt mat Peanut Boy
Bei de Congés Annulés kann een d'Museksredaktioun vum radio 100,7 vu ganz no erliewen. Dëse Méindeg ass eisen Hip-Hop-Expert Bobby Bieles un de Plackentelleren. Hien huet den talentéierte Peanut Boy invitéiert. E Méindeg den Owend um 6 Auer geet et lass.
De Peanut Boy ass den Initiateur vun den Axwai Beat Battles - eng Initiativ, déi Producer an d'Fënster stellt, erkläert de Bobby Bieles. "Hie war Producer a Rapper am Grupp 10lexic - ganz coolen Typ, null Ego, mee mega vill Potential."
Stilistesch hätte si decidéiert, zäitgenësseschen, danzbaren Hip-Hop ze spillen. "Am Stil vun Anderson .Paak oder sou funky Saachen, awer och original Samplen, bësse Funk a Soul aus de 70er." Awer si géifen och op de Publikum agoen, seet de Bobby Bieles.
All Samschdeg Owend huet een um radio 100,7 an der Emissioun Ligne 2 Rendez-vous mam Bobby Bieles. Am September geet d'Show an hir drëtt Saison, an de Bobby feiert seng honnertst Episod. "Fir d'Gebuertsdaagssendung hunn ech eppes Spezielles virbereet." Detailer dozou ginn et ganz geschwënn.
Niewent der Hip-Hop-Aktualitéit proposéiert de Bobby Bieles och ëmmer nees interessant thematesch Emissiounen. Hie fäert awer net, datt him d'Sujeten eng Kéier ausginn. "Et kann ee bal e Sujet aus allem maachen." Hip-Hop wier esou breet gefächert, an et géif esou vill Ënnergenrë ginn, datt hien och zwou Emissiounen an der Woch domat kéint fëllen.
Fir hie wier et wichteg, datt et Spaass mécht, an datt et sech net just un Nerds adresséiert.
De Bobby Bieles am Gespréich
Méi zum Thema
Vun annuléierte Congéen, Zouversiicht a Qualitéit
D'Congés annulés sinn dësen August, wann och an enger anerer Konfiguratioun wéi gewinnt. Och de radio 100,7 ass nees bedeelegt. De Fokus läit op enger regional an nationaler Programmatioun.
Slumbergaze an de Läbbel live am 100,7-Studio
D'Videoe vun de Sessions vun der Journée de la Musique sinn do! Et gëtt Rap op Lëtzebuergesch mat BC One, Skibi an dem Nicool, an instrumental elektronesch Musek mat Slumbergaze.
Eppes Réies, Raues fir ze lauschteren
Mat "RTJ4" liwwert de Rapduo Run the Jewels de Soundtrack fir d'Black Lives Matter Protestbeweegung. Knallhaart Beats treffen hei op Lyrics iwwer Policebrutalitéit a Rassismus.
Wien ass de Bobby Bieles?
D'Emissioun Ligne 2 ass e wichtege Rendez-vous fir d'Frënn vum Hip Hop zu Lëtzebuerg. All Samschdeg mixt de Bobby Bieles Musek, déi hien inspiréiert. Déi 30. Emissioun gouf grad diffuséiert.
