Literatur Wann d'Realitéit d'Fiktioun anhëlt

Deen neie Roman vum Karl Olsberg ass eng Dystopie, an där de Mënsch ëmmer méi der Technologie ausgeliwwert ass. D'Inspiratioun kënnt aus dem Alldag.

"Mir kennen alleguer d'Navigatiouns-Systemer, déi eis vun A op B guidéieren. A mir tendéieren alleguer dozou, deem Gerät blann ze vertrauen", erkläert de Karl Olsberg. Mir wieren eis net bewosst, datt all déi elektronesch Geräter ronderëm eis ëmmer méi zu Navie fir dat ganzt Liewe géife ginn.

Rosa-roude Google-Brëll

Facebook a Google géifen ëmmer méi fir eis decidéieren, u wéi eng Frënn mir grad géifen denken, wat wichteg fir eis wier, a wéi mir d'Welt gesinn. Deene meeschte Leit wier net bewosst, datt déi zwou Firmae géife probéieren, dat z'optiméieren: "Google gëtt mir ee rosa-roude Brëll op d'Welt, dee mir dat weist, wat ech wëll gesinn." Doduerch géif eist Weltbild verzerrt ginn. A "Mirror" géif deen Effekt sou verstäerkt ginn, datt et zu engem richtege Problem géif ginn.

Niewent der Verzerrung vun der Realitéit warnt den Auteur och virun enger méiglecher Ofhängegkeet vun der Technologie. Et wier wichteg, ee gesonden Ofstand ze halen.

Quasi zäitgläich zur Publikatioun vum Karl Olsberg sengem "Mirror" huet Google säin neie Smartphone Pixel virgestallt. Deen huet verschidde Funktiounen, déi staark un déi vum "Mirror" erënneren. Hie wär méi wéi just iwwerrascht gewiescht, datt d'Realitéit Elementer aus sengem Roman ageholl hätt. Beim Schreiwen hätt hien net dru gegleeft, datt ee scho sou no un deenen Entwécklungen dru wier.

Immunsystem fir Technologie

Als Thriller-Auteur géif et him ganz kloer drëm goen, datt de Lieser Angscht géif kréien, sou de Karl Olsberg. A Realitéit wier hien awer net sou skeptesch, wat Technologie géif ugoen. Technik u sech wier net schlecht, mee si géif falsch genotzt ginn. "Mir verstinn net, wat d'Technik mat eis mécht, well mir nach net d'Immunsystem géint hir Tentatiounen a Geforen entwéckelt hunn."

E-Mailen, déi ee Milliounegewënn verspriechen, géif all Mënsch instinktiv läschen. An anere Beräicher géif dës Zort vun Experienz eis nach feelen. "Ee vu mengen Ziler als Schrëftsteller ass ze soen: Oppassen, net alles wat Dir däi Computer seet, muss du och maachen. Dat kéint och mol no hanne lass goen."

Ënner sengem richtegen Numm Karl-Ludwig von Wendt huet den Auteur eng App entwéckelt, déi de Lien zwëschent elektroneschen a klassesche Bicher mécht. Lauschtert dozou de Reportage vum 22. November.