Netflix Um Camping ass eng méi lass

De Gangsterfilm ''Ferry", vun der flamännescher Realisatrice Cecilia Verheyden, ass de Prequel vun der belsch-hollännescher Serie ''Undercover''. Deelweis skurrill an awer herrlech drëchen.

Michel Delage

Filmkritik Ferry

Eng Drogeband vun Amsterdam gëtt vu Gangsteren ausgeraibert. Dem Boss seng riets Hand, de Ferry Bouman (Frank Lammers), gëtt ugestallt, déi Responsabel vum Iwwerfall ze fannen an ze liquidéieren. D'Spuer féiert de Ferry séier op e Camping a Flandern. Do léiert en niewelaanscht déi attraktiv Danielle (Elise Schaap) kennen, déi e Kiermesstand bedreift. Mee wéi esou dacks am Liewen sinn och hei Léift a Geschäft nëmme schwéier ënnert een Hutt bréngen...

De Gangsterfilm ''Ferry'' vun der flammännescher Realisatrice Cecilia Verheyden dierft all deene bekannt virkommen, déi ''Undercover'' gesinn hunn. An der belsch-hollännescher Serie, där hir zwou Staffelen 2019 respektiv 2020 erauskomm waren (an och op Netflix lafen), goung et ëm zwee Polizisten, déi inkognito an engem Camping an der belscher Provënz Limburg enquêtéiert haten. Hiert Zil war et, den hollänneschen Drogentrafikant Ferry Bouman, deen do seng Weekender verbruecht huet, in flagranti z'erwëschen.

Flappseg a brutal, mee loyal

De Film erzielt elo d'Virgeschicht vun der Serie, déi een net onbedéngt muss virdru gesinn hu fir nozekommen. Hei ass de Ferry nach nëmmen engem anere Kriminelle säi grad esou brutalen ewéi flappsege Lakai. Am Géigesaz zum klassesche Muster, nodeem en ambitionéierten Dénger mat enger Mëschung aus Opportunismus a Verrot lues a lues d'Karriärleeder am Milieu eropklëmmt, schéngt den Haaptprotagonist just duerch d'Ëmstänn a seng spéider Roll als Drogeboss eragerëtscht ze sinn. De Ferry ass en duerchaus loyalen Typ, deem een, trotz dem kriminelle Kontext, eng gewëssen Integritéit kann zegutt halen.

De Film insistéiert um Ferry sengem familiären Hannergrond, dat heescht eng schwiereg Kandheet mat engem brutale Papp an, am Erwuessenenalter, eng gespaante Bezéiung zur Schwëster. Den Drogeboss Brink, fir deen hie schafft, a seng Renconter mat der Fra um Camping, si souzesoe Projektioune vu sengem Papp a senger Schwëster, mat deene hie sech elo muss konfrontéieren.

Gutt Balance tëschent Skurrilitéit an Drëchent

Datt de Film sech gréisstendeels op engem Camping ofspillt, schaaft schonn en interessante Kontrast zum urbane Kader vun den Zeenen zu Amsterdam. Et wier sécherlech e Feeler gewiescht, deen Decalage ze vill z'ënnersträichen, an esou an eng Zort bëllege Klamauk ze verfalen an de Personnage vum Ferry an de Comedy-Regëster ofdriften ze loossen.

Trotz enger Partie méi oder wéineger skurrillen Niewepersonnagen ass dat glécklecherweis net de Fall. De Grondtoun bleift eescht, mir si kloer am secë Gangster-Genre. ''Ferry'' huet guer net d'Ambitioun, e Meeschterwierk ze sinn. Dofir ass et e gutt ficeléierte klenge Film, deen ee mat Pleséier ka kucken.

An der Mediathéik:

Kultur / / Michel Delage
Lauschteren

Méi zum Thema

Killingoftwolovers Filmkritik
Sooner.lu

Eng Koppel trennt sech, ee vun de Partner gëtt domat manner gutt eens: Den amerikaneschen Independant-Drama "The Killing of two lovers" baut mat clevere Mëttele Sprengpotential op.

The Disciple.jpeg Filmkritik
Netflix

Laangen ondankbare Wee vun der spiritueller Erfëllung oder séier iwwerflächlech Satisfaktioune vun der Konsumgesellschaft? Deen Dilemma steet am Mëttelpunkt vum kuckenswäerten indesche Film "The Disciple".

Net verpassen

  • 24.01. Opruff Media & Me

    Media and Me_2022_1200x667px.jpg

    De radio 100,7 mécht och dëst Joer mat beim Projet Media & Me an Dir kënnt Iech elo dofir umellen.

Programm

  • Notturno

  • On air

    Virum Dag vu 6 bis 10

  • Panorama

  • Virum Dag vu 6 bis 10

  • Noriichten

Dossieren

  • Buchkriticken

    D'Kulturredaktioun vum radio 100,7 presentéiert Rezensioune vu Lëtzebuerger an internationale Bicher.

  • Kulturjoer Esch2022

    Esch, zesumme mat anere ProSud-Gemengen a franséische Grenzgemengen, ass 2022 europäesch Kulturhaaptstad. An eisem Dossier fannt Dir alles iwwer d'Hannergrënn an d'Projeten, déi fir d'Kulturjoer entstoe wäerten.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen