Et ass eng Geschicht, bei där een nëmmen hoffe kann, datt se eenzeg ass, esou erschreckend ass se. Op Netflix gëtt et eng nei Dokumentarserie, déi de Fall Jeffrey Epstein beliicht.
Den Numm Jeffrey Epstein ass deene meeschte bekannt. Den Jeffrey Epstein gouf inculpéiert wéinst sexuellem Mëssbrauch a Prostitutioun vu Mannerjäregen a gouf dout a senger Zell fonnt. Wat awer manner bekannt ass, ass dat wat d'Serie weist, an de Fall Epstein esou krass mécht. An zwar wéi laang hien onbestrooft dovu koum a wéi vill Moyenen hien dru gesat huet, fir seng Affer an och d'Justiz roueg ze stellen.
D'Serie dokumentéiert de Fall mat Hëllef vun etlechen Interviewen, vun deemolegen Affer, dem Police-Chef vu Palm Beach, Journalisten, Affekoten, privaten Detektiven, déi fir de FBI geschafft hunn a Psychologen, déi sech mat esou enger Zort vu Mësshandlung beschäftegen.
Virun allem awer sinn et déi emotional Interviewe mat den deemolegen Affer, déi dës Serie zimmlech ergräifend maachen. Esou berichten Affer net nëmmen hir Erliefnesser, mee och generell iwwer hir Kandheet, hir aner Mëssbrauchsgeschichten oder Obdachlosegkeet. Dëst kann een als e Manko gesinn, well d'Serie domadder hefteg op d'Tréinendrüs dréckt oder deelweis schockéiert.
Mee gläichzäiteg sinn dës Aussoen och wichteg fir d'Verständnis vum Epstein sengem Schema. Et ass mat Hëllef vu Mannerjäregen, déi ouni Wunneng an ouni Mëttele waren, wéi den Epstein e ganzt Netzwierk vu Meedercher opstelle konnt, déi hien an anerer a sengem Krees sexuell mësshandele konnt.
An och wann et net einfach ass d'Geschichten ze héieren, déi déi Meedercher zielen an hir Trauer, Roserei a virun allem Hëlleflosegkeet an hiren Aen ze gesinn, esou ass et wichteg, datt hir Geschicht gezielt gëtt. Well si stinn als Beispill an Zeeche fir all déi Meedercher, déi Änleches erliewen an de Courage net fanne fir ze erklären, firwat Me Too wichteg ass, firwat sexuelle Mëssbrauch an Handel schlëmm sinn, an datt se real sinn.
Eng Tortur fir d'Meedecher
All Meedchen, dat him e weidert Meedche vermëttele konnt, huet eleng dofir weider 200 Dollar kritt. Esou hunn zwee bis dräi Meedercher et fäerdegbruecht him bis zu 60 Meedercher an e puer Joer ze vermëttelen.
Fir ze verstoen, wéi esou vill Meedercher dem Epstein säi Spill konnte matmaachen, ouni ze refuséieren, ass et wichteg ze verstoen, wat Sue fir si bedeit hunn, wat et fir si bedeit huet, aus engem verwahrlosten Doheem, voller Gewalt, flüchten ze kënnen am Alter vu 14 bis 16 Joer.
Am Fall vum Epstein gëtt net nëmme seng Influenz op seng Affer ënner de Meedercher kloer, mee och op héijer Justizposten, wéi den deemolege Staatsaffekot Alexander Acosta an dem deemolegen US Justizminister. Et huet schlussendlech eng ganz Maschinerie vu Recherchen op villen Niveaue gebraucht an iwwer 15 Joer Verhandlunge fir géint een eenzege Mann kënnen unzekommen. An et huet vill Courage vun de Meedercher gebraucht, déi haut Frae sinn, fir doriwwer ze zielen, mat wat fir Mëttelen den Epstein hiert Schweigen erzwénge wollt. Si zielen iwwer Kandheeten, deelweis ouni Suergen, deelweis voller Mëssbrauch, vu jorelaangem Plënneren aus Angscht virum Epstein, vu Belagerunge vu privaten Investigateure virun hirer Hausdier oder endlose Verhéier fir hir Glafwierdegkeet ze dekredibiliséieren.
D'Monster sinn dobaussen
An der Dokumentatioun kommen och ëmmer erëm Accusatioune géint de brittesche Prënz Andrew op, vum Virginia Roberts awer och aneren Zeien, déi aussoen, datt hien net onschëlleg ass, an och net ënner enger komescher Form vun Amnesie leit, déi just räich Pedophille betrëfft, wéi een et a sengem Interview mat der BBC am November d'lescht Joer konnt erliewen.
Natierlech ass déi Serie kee geriichtleche Prozess, et bleift un de Geriichter fir ze jugéieren, wie schëlleg ass. Mee wa Beweiser als éischt op Netflix landen, éier datt se um Geriicht landen, da kann ee sech just froen, op net schonn nees e räiche Mann sech Fräiheeten akaaft huet.
"D'Monster sinn dobaussen, a si mëssbrauchen nach ëmmer aner Mënschen. Firwat si nach net genannt an humiliéiert gi sinn, kann ech net verstoen", seet d'Virginia Roberts, Affer vum Jeffrey Epstein a sëllegen anere Männer aus dem Esptein sengem Donstkrees.
