Offiziell Kompetitioun Schutz virun der Baussewelt oder Gléck?
Luguber Atmosphär, schwaarzen Humor a soss Absurditéiten: mat sengem éischte Fiktiounsfilm "The Waiter" reit sech de Steve Krikris an déi bizare griichesch Well à la Yorgos Lanthimos an.
De Renos (Aris Servetalis), Serveur an enger Patisserie zu Athen, féiert een disziplinéiert, rouegt, einsaamt Liewen. Owes zitt hien sech, vu Gréngs ëmginn, a säin Appartement zeréck. Enges Daags verschwënnt säin Noper. Ee Friemen huet hien ersat. Wat ass mam Noper geschitt?
De griichesche Realisateur Steve Krikris huet, no ongeféier 500 Publicitéiten, hei säin éischte Long-métrage gedréint. Ee Film noir ("clair-obscur"-Ästhetik), deem säi luesen Erzielstil a skurrillen, schwaarzen Humor un d'Coen Brothers (Barton Fink) oder och un den Aki Kaurismäki erënnert. "The Waiter" hëlt sech Zäit, fir eng luguber Atmosphär opzebauen: Zeene gi widderholl a variéiert (wat plazeweis eng gewësse Komik produzéiert), Erwaardunge gi geschaaft...
Ambivalent Konfrontatioun
De Film geet och spuersam mat den Dialogen ëm, um Ecran brauch net all ze vill ze geschéien, villes gëtt nëmmen ugedeit: um Spectateur dann, fir eent an eent zesummen ze zielen... an ze zidderen!
"The Waiter" lieft net zulescht vun der Konfrontatioun tëschent dem Serveur Renos (Aris Servetalis), eng Zort Buster Keaton, dee keng Minn verzitt, egal wat hie grad viru sech um Teller leien huet, an dem ambivalente Friemen (Giannis Stankoglu), deen eng faszinant a geféierlech Präsenz ausstraalt, gläichzäiteg verféiert an Angscht mécht, an de Renos aus senger Reserve lackelt. Déi flott jonk Fra (Chiara Gensini) tëschent den zwee Männer: gemeinsamen Unzéiungspunkt oder Mauer, déi eng latent Homosexualitéit andämmt?
Bizare griichesch Well
Mat "The Waiter" reit sech de Steve Krikris onmëssverständlech an déi bizare Well vu griichesche Realisateuren à la Yorgos Lanthimos, Babis Makridis, a wéi se net all heeschen, an - eng Band vu Kollegen, wou deen een sech och alt emol als Acteur fir deen aneren zur Verfügung stellt.
Griicheland huet an deem leschte Joerzéngt eng Rëtsch Filmer ervir bruecht, an deenen déi sozio-ekonomesch Kris iwwer dat Däischtert, dat Absurd zum Ausdrock kënnt, verschafft gëtt. Virun deem Hannergrond thematiséiert "The Waiter" ënnert anerem d'Schwieregkeet, fir sech aus der Alldagsroutine ze léisen. Eng Routine, déi zwar Schutz virun de Gefore vun der Baussewelt bitt, mee zum Präis vun engem Verzicht op ee méiglecht Gléck.
Méi zum Thema
Luxfilmfest
De Buedem ënner de Féiss verluer
De Manktem un Halt am perséinleche Liewen, virum Hannergrond vun der moderner Aarbechtswelt, domat beschäftegt sech déi éisträichesch Realisatrice Marie Kreutzer an "Der Boden unter den Füssen".
Luxfilmfest
Loosst d'Fangere vun den Drogen!
De kolumbianesche Thriller "Birds of Passage" (Pájaros de verano), vun de Realisateure Cristina Gallego a Ciro Guerra, kombinéiert de klassesche Gangster-Epos mat engem Portrait vun der Wayuu-Ethnie.
Luxfilmfest
Opportunistesch a feig Bourgeoisie
De Benjamín Naishtat hëlt a sengem Film "Rojo" déi lescht Méint virun der Militärdiktatur an Argentinien ënnert d'Lupp. Virun allem d'Bourgeoisie an hir Motivatiounen hëlt hien an d'Viséier.
Luxfilmfest
Däischtere Portrait vun der Aarbechterklass
De renomméierte Fotograf Richard Billingham huet mat "Ray & Liz" säin autobiografescht Wierk a Form vu Fiktioun weidergefouert. Eng Kandheet an engem schappegen Ëmfeld, net ouni Häerzlechkeet.
Luxfilmfest
D'Liewen, eng wonnerschéin a gëfteg Blumm
Déi am Vietnam gebueren Ash Mayfair huet mat "The Third Wife" hiren éischte Long-métrage gedréint. Ee Film iwwer d'Plaz vun der Fräiheet an engem vum Schicksal dominéierte Liewen.
Luxfilmfest
Wou ass deen Techniker?!
Eng minimalistesch Mise en scène a subtil-dréchenen Humor zeechnen "The Announcement" (Anons) aus. Den tierkesche Film iwwer ee versichte Militärputsch kéint duerchaus een aktuelle Bezuch hunn ...
Luxfilmfest
Ee ganze System ass aus der Bunn geroden
Mat enger Mëschung aus Thriller a Satir denoncéiert de spuenesche Realisateur Rodrigo Sorogoyen an "The Realm" (El Reino) d'Korruptioun an der spuenescher Politik - a fuerdert zum Nodenken op.
