Poesie "Puisque je suis vivant, si vivant"

D'Angscht virum Doud schéngt iwwerwonnen, elo geet et ëm dat Essentiellt. "Mais le merle n'a aucun message" heescht dem Lambert Schlechter säin neie Gedichtband, mat Zeechnunge vu senger Schwëster Lysiane.

Michel Delage

Buchkritik Schlechter Merle

''je reste, mon amour, je reste encore un peu''

Dee Vers fënnt een op enger vun deene leschte Säite vum Lambert Schlechter sengem neie Gedichtband ''Mais le merle n'a aucun message. 99 neuvains. VIe série'' (Editions Phi), eng Sammlung vun Néngzeiler, déi de Schrëftsteller tëschent Mee 2018 an Abrëll 2020 geschriwwen huet : de Gros op Franséisch, eenzel Gedichter och op Englesch, Italieenesch a souguer Afrikaans (Iwwersetzung). Deen een oder aneren Text liest een zweemol, eng Kéier op Franséisch an eng Kéier iwwersat.

De Lambert Schlechter huet elo 79 Joer. D'Perspektiv vum Doud, deen hie vläicht wéinst senger Unzéiungskraaft ''la camarde en porte-jarretelles'' nennt, bestëmmt säi Schreiwe schonn zënter méi laangem. Wéi soll et an deem Alter och anescht sinn...

War et dat?

Am Laf vun de Gedichter presentéiert sech e Mënsch, dee virun de Ruine vu sengem Liewe steet. D'Kandheet ass definitiv verluer (''l'enfant est parti/se noyer dans la grande mer''), vu senger Amante krut en de Kuerf, eng Erektioun kritt e souwisou net méi (''et je sors un stylo pour noter://c'est la seule raideur qui va me rester''). E Bléck an de Spigel geet duer :

''i looked at that old man

so ugly, so doomed and lost''.

Souguer d'Sprooch schéngt sech opzeléisen, léisst Unzeeche vu Senilitéit erkennen :

''des fois que me venirait une idée

mais il ne m'en viendre pas''.

Wa schonn d'Conjugaisoun net méi sëtzt, da kann ee grad esou gutt apaken, oder ?

''je reste, mon amour, je reste encore un peu'' ass am Fong e pessimistesche Vers.

Carpe diem

Mee et kann een dee Vers och anescht liesen : ''je reste encore un peu'', et ass nach net fäerdeg, et bleift jo nach e bëssen Zäit. Anescht wéi nach a sengem rezente Buch ''Je n'irai plus jamais à Féodossia'', schéngt de Lambert Schlechter elo d'Angscht virum Doud iwwerwonnen ze hunn. D'Liewensenn ass zwar virgezeechent, hien akzeptéiert et awer.

Elo heescht et, dat Bescht dorausser maachen : ''croque la avant qu'elle ne pourrisse'', carpe diem, also. ''hay que caminar, n'y a qu'à cheminer''. Dem Doud ëmmer méi no ze kommen heescht awer net, datt een dofir ëmmer méi onglécklech géif ginn:

''c'est un bonheur si exquis

de marcher, pas après pas

chaque pas réfute la chute''.

Komplementar Zeechnungen

Eng ''douce mélancolie'' ass dem Auteur seng Grondstëmmung. Si spigelt sech an den Illustratioune vu senger Schwëster Lysiane Schlechter erëm, déi am Buch gläichberechtegt nieft dem Text existéieren : op der lénker Säit all Kéiers zwee Néngzeiler, op der rietser eng Zeechnung.

Meeschtens sinn et monochrom Dramvisiounen, déi sech op d'Texter niewendru bezéie kënnen oder och net, jiddefalls si se komplementar an droen zur genereller Atmosphär vum Band bäi.

''Asiatesch'' Serenitéit

Et ass eng Form vu Serenitéit, déi de Lambert Schlechter erreecht huet : ''à la mort je pense, et souris''. D'Referenz op klassesch chinesesch Dichter ewéi den Du Fu respektiv de Lu Yu kënnt net vun ongeféier. De Gedichtband ass vun asiatescher Weisheet duerchdrongen.

Et ass d'Iddi vun enger Harmonie tëschent Mënsch an Natur, d'Begeeschterung fir elementar Naturphänomeener wéi d'Sonn (''cette chose/absolument inouïe : l'existence du soleil''), de Stärenhimmel, den Zyklus vun de Joreszäiten.... Et ass de Verweis op de populäre chinesesche Glawen un déi Giel Quellen (''te noyer dans les Sources jaunes''), also d'Land vun den Doudegen, Source vum Liewen.

E weidere Bezuch op déi asiatesch Traditioun sinn Déiereparabelen. Dem Lambert Schlechter säi räiche Bestiarium ëmfaasst Spannen, Schlécken, Wierm, Kiewerleken, Ameisen, Déieren also, déi um Buedem krauchen, sech mat der Matière erëmklappen, an net héich am Himmel iwwert Allem schwiewen : ''il n'y a pas d'aigle dans mes poèmes''. Eng flott Manéier fir säin Hang zum Materialismus als Liewensphilosophie z'ëmschreiwen.

Essentiell

A wann hie sech scho mat engem Vull identifizéiert, da mat der Märel, am Géigesaz zum Kueb, Symbol vum Doud :

''ne t'alarme pas quand

croasse le chafouin corbeau

ce n'est pas toi qu'il vise

il ne parle que pour lui-même

écoute plutôt le merle

qui n'a aucun message

il ne fait que chanter

et il n'y a rien à comprendre

sa mélodie te ramène à l'essentiel''.

Dat Essentiellt, dorëms geet et dem Lambert Schlechter elo.

An der Mediathéik:

Kultur / / Michel Delage
Lauschteren

Méi zum Thema

Bluttsëffer Buchkritik
Literatur

Familljesaga, Duerfchronik, Kulturgeschicht - dem Jemp Schuster säi flotten éischte Roman ''Bluttsëffer'' (Edition Imprimerie Centrale) beschreift d'Kontinuitéiten an d'Bréch vum Liewen um Land.

Jean Sorrente Guerre du temps Buchkritik
Literatur

Wéi d'Kollaboratioun mat den Nazien déi nächst Generatioune belaascht ... A sengem komplexe Roman "La Guerre du temps" verschafft de Jean Sorrente eng Kéier méi déi problematesch Geschicht vu senger Famill.

Jean Back L'Arc di Marianna Buchkritik
Literatur

Den epesche Roman "L'Arc di Marianna" (Editions Guy Binsfeld) erzielt eng tragesch Libesgeschicht. De Jean Back huet sech ganz vill virgeholl. Sengen Ambitioune gëtt hie bei Wäitem net gerecht.

Lambert Schlechter - Je n'irai plus jamais à Feodossia
Literatur

"Je n'irai plus jamais à Feodossia" ass den néngte Volume vum Lambert Schlechter senger Serie vu kuerze Prosatexter "Le Murmure du monde". Dës Kéier steet d'Vergänglechkeet vum Liewen am Mëttelpunkt.

Net verpassen

Programm

  • Notturno

  • On air

    Virum Dag vu 6 bis 10

  • Panorama

  • Virum Dag vu 6 bis 10

  • Noriichten

Dossieren

  • Dossier: Relatiounen tëscht Portugal a Lëtzebuerg

    Haut ass et den zweeten a leschten Dag vun der Staatsvisitt a Portugal. Eng grouss Lëtzebuerger Delegatioun ass den Ament zu Lissabon. An eisem Dossier fannt dir all eis Bäiträg an Artikelen iwwer d'Theema.

  • De Krich an der Ukrain

    De 24. Februar 2022 huet Russland d'Ukrain militäresch iwwerfall. Déi westlech Länner hu mat Sanktioune reagéiert, Millioune vu Leit sinn aus der Ukrain geflücht.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen