James Romberger - Post York New York no der Klima-Apokalyps
Wéi gesäit d'Welt aus, wa mer de Klimawandel net kënne bremsen? Déi Fro stellen sech grad net nëmme Wëssenschaftler, mee och vill Kënschtler, dorënner den Zeechner James Romberger, deen sech d' Zukunft vu senger Heemechtsstad New York ausgemoolt huet.
Den James Romberger moolt sech a "Post York" d'Zukunft vu senger Heemechtsstad New York aus, nodeems d'Äis un de Polen duerch de Klimawandel geschmolt ass, an d'Stad ënner Waasser steet.
Tëscht Climate Fiction an Horrorcomic
Säin Held, de Crosby, fiert mam Schlauchboot duerch Stroossen, an deene just nach vereenzelt Leit an den Héichhaiser liewen. Et erkennt ee séier eng Rëtsch Science-Fiction-Elementer, déi den Zeechner hei kombinéiert: dramatesch Biller vun enger Welt, déi duerch d'Klimakris zerstéiert gouf, wéi se fir de rezente Phenomeen vun der Climate Fiction typesch sinn, mee och allgemeng Zenarien aus post-apokalypteschen Erzielunge wéi de Kampf ëm knapp Ressourcen an Eenzelgänger, déi duerch d'Ruine vun der Zivilisatioun zéien. Mat sengen dacks makabere Schwaarz-Wäiss-Zeechnunge steet de Romberger awer och an der Traditioun vum Horrorcomic.
Villes kënnt engem bekannt vir, bei der Erzielstruktur erweist sech "Post York" awer als ganz originell. Vun den zwee Haaptevenementer am Buch - eng Renconter vum Crosby mat enger jonker Fra an eng mat engem Wal - kréie mer dräi Versioune presentéiert, déi mol besser a mol méi schlecht ausginn.
Onbehollef Ëmsetzung
Dëse Prinzip kann een als Kommentar zur aktueller Diskussioun iwwer d'Klimakris verstoen, wou et jo och drëms geet, Alternativen ze entwerfen, fir de Laf vun der Geschicht ze änneren.
D'Iddi ass am Comic allerdéngs besser, wéi hir Ëmsetzung. Et geet net ëmmer alles op, d'Dialoger sinn onbehollef an et mierkt een, datt dem James Romberger seng Stäerkten éischter an der Illustratioun, wéi an der Erzielung leien. Zum Gléck ass "Post York" awer och eng Graphic Novel, déi vun de Biller lieft an dacks ouni Dialoger auskënnt. Dem Romberger gelénge memorabel Sequenzen, wou hie mat wéinege Strécher an engem labberen, onreegelméissege Layout eng bedréckend Atmosphär erschaaft an engem d'Tristesse vun der Welt an de Leit, déi an hir liewe mussen, méi no bréngt.
An der Mediathéik:
LauschterenMéi zum Thema
An du koumen d'Capybaraen
D'Capybaraen musse virun de Jeeër flüchten a sichen Hëllef um Héngerhaff. D'Hénger allerdéngs sinn net begeeschtert, datt hiren Alldag op d'Kopp geheit gëtt. E beréierend Kannerbuch vum Alfredo Soderguit, wat elo op Lëtzebuergesch iwwersat gouf.
Judith Vanistendael: Penelopes zwei Leben
D'Penelope ass eng belsch Chirurgin, déi am Biergerkrich a Syrien am Asaz ass. Déi zwee Liewen aus der Graphic Novel bezéie sech op de Kontrast tëschent där Aarbecht an dem quasi normale Familljeliewen.
Aus dem Liewe vun engem Comiczeechner
"Oleg" begleet ee Mann um Enn vu senger 40er, deen eng kreativ Kris duerchlieft a sech net méi an der Popkultur erëm fënnt. Eng BD, déi ëmmer erëm iwwer d'Linnen tëschent Realitéit a Fiktioun spréngt.
Geschichten aus der italienescher Immigratioun
An "Bella Ciao" erzielt de Baru Geschichten iwwer déi italienesch Immigratioun an den industriellen Norde vun der Lorraine. Se stamen deelweis aus dem Zeechner sengem eegenen Ëmfeld.
