Frankfurter Buchmesse 2016 "Léiere Lieser ze ginn"

De Bodo Kirchhoff hëlt d'Auszeechnung mam däitsche Buchpräis fir säi Buch "Widerfahrnis" den Ëmstänn entspriechend relax. Hien hätt net driwwer nogeduecht wat et bedeite géif, Laureat vum Präis ze sinn. Wéi hien d'Noriicht vum Gewënn kritt hätt, wier hien erliichtert gewiescht an hien hätt sech dorop konzentréiert, wat hie géif soen. Et géif awer net nëmmen ëm d'Konzentratioun, mee och ëm den Engagement goen, esou de Schrëftsteller. "Et muss ee sech fir all Interview nei engagéieren." Den Auteur fënnt et fuerchtbar, wann een den Androck kréich, hie géif ëmmer dat selwecht soen. Hie géif probéieren, all Interveiw esou ze ginn, wéi wann et deen éischte wier.

Den Titel vum Bodo Kirchhoff sengem priméierte Wierk "Widerfahrnis" ass e Wuert, wat een net all Dag héiert, a vun dem een esou guer am Duden keng Definitioun fënnt. De Bodo Kirchhoff erzielt, hien hätt dat esou däitschkléngent an awer net geleefegt Wuert op engem Seminaire eng éischte Kéier héieren. Et wier fir hien direkt kloer gewiescht, datt hien emol e Buch mat deem Titel schreiwe wéilt.

D'Fro ass natierlech: Wat heescht Widerfahrnis? Fir de Bodo Krichhoff heescht et am méi enken theologesche Sënn am Fong just:

"Ein tiefgreifendes, spirituelles Erlebnis, dem man selber nichts entgegen setzen kann und das einen, aufgrund der Tatsache das man nichts entgegen setzen kann, im Innersten verändert."

Vu "Schundroman" bei "Widerfahrnis"

De Schrëftsteller huet 2002 mam Wierk "Schundroman" eng Persiflage op den däitsche Literaturbetrieb geschriwwen an d'Handlung an d'Kulisse vun der Frankfurter Buchmesse placéiert. Elo steet hie mat sengem aktuelle Roman selwer op där Buchmesse an eben dem däitsche Literaturbetrieb. Huet den Auteur seng Iddien aus "Schundroman" da revidéiert? Nee, äntwert dorop de Bodo Kirchhoff. "Ech sinn zwar elo en Deel dovun, mee meng Meenung bleift."

Hie wier och gefrot ginn, ob hie sech kéint virstellen, ee Buch ze schreiwen, wat op der Buchmesse spillt. "Dunn hunn ech gesot, scho geschitt, d'Buch heescht 'Schundroman'. An den Titel hunn ech net fir näischt gewielt."

Léiere Bicher ze liesen

De Bodo Kirchhoff ass der Meenung, datt wann et ëm Bicher geet, et weder e richtegen, nach ee falsche Choix géif ginn. Ënnert de Bicher, déi et gëtt, wieren déi meescht fir d'Mënschen - och dir den Ulirch Kirchhoff - Nei-Editiounen. Et géif ee si nei entdecken, well een nach näischt dovun héieren hätt oder si nach net gelies hätt.

Aus deem Grond misst een am Laf vum Liewen och Léieren, Lieser ze ginn. "Mir léieren zwar Liesen a Schreiwen, mee mir léieren net Bicher ze liesen." Dat géif laang daueren, mengt den Bodo Kirchhoff. An deen huet scho puer Joer méi Erfahrung doran wie muench aneren.

"Widerfahrnis" vum Bodo Kirchhoff ass an der Frankfurter Verlagsanstalt erauskomm.