Mini-Serie "L'amour a ses réseaux"

Bei der Serie ass all Episod véier bis sechs Minutte laang. Aus dem Off erzielt eng Fra oder e Mann ganz lässeg, wéi zum Beispill iwwer engem Glas Wäin, hir oder seng Geschicht. Déi ganz Serie ass animéiert mat gezeechenten Illustratiounen an zwou, maximum dräi Faarwen.

De Paräisser Studio Darjeeling huet genee dee richtegen Ausdrock fir dës Serie fonnt. An zwar ass et e bësse wéi e Kappkino. D'Zeechnung, am Stil vun engem Stëft op engem wäisse Blat, hëlt an adaptéiert hir Form am Laf vun der Erzielung. Heiansdo ass se méi detailléiert, zum Beispill, wann e Raum oder d'Ausgesi vun engem Mënsch beschriwwe ginn.

Kreativ Symboler

Heiansdo ass se méi kreativ a gräift op Symboler zeréck, heiansdo och genee net. Wann en Temoignage vun enger Fra zielt, déi sech absolut onméiglech behëlt, erschéngt si mat hirem Gesiicht prompt um Kierper vun engem Draach. D'Illustratioune sinn also voller humorvollen a kreativen Detailer, déi maachen, datt ee Loscht huet sech d'Episoden e puermol hannerteneen unzekucken.

Et däerf een net vergiessen, datt bei Dating-Geschichten och Intimitéiten ausgetosch ginn. Ëm Zeechnunge vu Peenissen, déi sech a Villercher verwandelen, oder e Bësch vun Dildoe kënnt een net derlaanscht. Mee keng Angscht, mir sinn net beim Wolinski, d'Zeechnungen si vläicht och mol explizitt, mee bleiwen awer harmlos.

Sech an deen aneren eraversetzen

Dat Witzegt um Toun vun der Serie ass, datt een den Erzieler versteet. Et kann ee verstoen, firwat hien oder si deen aneren op emol blöd oder iwwerdriwwe fënnt oder sech selwer blöd behëlt.

Sech ze treffen, just op Basis vun enger Foto an zwee Sätz, féiert eben dozou, datt ganz ënnerschiddlech Mënschen openeen treffen. Gläichzäiteg huet een d'Gefill, datt wierklech komesch Mënschen hiert Onwiesen op esou Reseauen dreiwen. Mee deemno wéi d'Perspektiv eben ass, ass ee vläicht och selwer déi wierklech komesch Persoun.

"Les rendez-vous pris via Tinder, Happn, Bumble, Ok Cupid ou autre nous mettent face à de grands bouleversements sociétaux. Ces outils changent, au moins en partie, nos manières de séduire ou de choper et donc, nos pratiques en termes de relations sentimentales, amoureuses ou sexuelles.",

schreift d'Renée Greusard op L'Obs.

Ee Frieme kenneléieren

Dating-Apps maachen et ville Leit méiglech, méi nonchalant un d'Saach erunzegoen, schliisslech ass déi aner Persoun en totale Friemen, deen ee vläicht ni méi erëmgesäit, dat hoffe verschidde Leit op d'mannst nom Date.

Den Toun vun der Serie passt, d'Erzielungen si spontan an net erfonnt. Virun allem dréit d'Serie déi kreativ Touche vun de Realisateuren a Realisatricen: Cécile Rousset, Adreinne Nowak a Romain Blanc-Tailleur vum Darjeeling Studio zum lackeren Toun bäi. An deem Sënn: Bien vu!