Gezeechent Judith Vanistendael: Penelopes zwei Leben

D'Penelope ass eng belsch Chirurgin, déi am Biergerkrich a Syrien am Asaz ass. Déi zwee Liewen aus dem Titel vun der Judith Vanistendael hirer Graphic Novel bezéie sech op de Kontrast tëschent där Aarbecht an dem quasi normale Familljeliewen, dat d'Penelope soss féiert.

Jeff Thoss / cbi

Penelopes zwei Leben

D'Geschicht spillt bal komplett wärend dréi Méint, déi d'Penelope tëschent zwee Asätz doheem an der Belsch verbréngt, esou datt ee vun deem anere Liewe praktesch näischt gesäit. Trotzdeem ass Syrien ëmmer present, bal wéi e Schiet, dee sech iwwer d'Familljeliewe leet. De Konflikt tëschent deenen zwee Liewen, tëschent de Responsabilitéiten a Syrien an deenen an der Famill, ass dat zentral Theema bei der Vanistendael.

"Penelopes zwei Leben" ass e rouegt, onopgereegt Buch. Fir d'Penelope ass et kloer, datt si hiren humanitären Asaz weidermécht, mee vis-à-vis vun hirer Famill muss si sech erklären, grad virun hirer Duechter Helena, déi kee Verständnis fir der Penelope hire Choix huet an drop pocht, datt hir Mamm fir si do ass. Mat hirer psychologescher Komplexitéit an hiren dynamesche Relatioune sinn d'Figuren eng vun de grousse Stäerkte vun der Judith Vanistendael, déi och eng grouss Sensibilitéit am Ëmgang mat hinne weist.

D'Buch huet och e klore feministesche Volet. Op gewëss Aart a Weis geet et ëm déi klassesch Verbindung tëschent Beruff a Famill, déi hei natierlech zougespëtzt ass, an déi d'Zeechnerin och duerch Uspillungen un den Homer a seng "Odyssee" illustréiert. Där hir Figurekonstellatioun dréit si hei ëm: Et ass d'Penelope, dat d'Famill verléisst, fir d'Welt ze retten, wärend de Mann, also den Odysseus, doheem bleift.

Déi allgemeng roueg Qualitéit vum Comic fënnt een och am Stil: D'Judith Vanistendael notzt Aquarellzeechnunge mat douce Faarwen an eng schwaarz Tuschlinn, déi dacks just d'Konture vun de Figuren an hir Gesiichter accentuéiert. Esou ass "Penelopes zwei Leben" insgesamt eng Graphic Novel, déi duerch d'Liichtegkeet an d'Nuancen iwwerzeegt, déi se an hir komplex Theemen erabréngt.

Méi zum Thema

Oleg vum Frederik Peeters
Frederik Peeters, Oleg

"Oleg" begleet ee Mann um Enn vu senger 40er, deen eng kreativ Kris duerchlieft a sech net méi an der Popkultur erëm fënnt. Eng BD, déi ëmmer erëm iwwer d'Linnen tëschent Realitéit a Fiktioun spréngt.

Bella Ciao
Baru - Bella Ciao

An "Bella Ciao" erzielt de Baru Geschichten iwwer déi italienesch Immigratioun an den industriellen Norde vun der Lorraine. Se stamen deelweis aus dem Zeechner sengem eegenen Ëmfeld.

Net verpassen

  • Rapport d'activités 2021

    Banner.jpg

    De Rapport d'activités 2021 vum radio 100,7 ass verëffentlecht ginn. E gëtt en Abléck an d'Aktivitéite vun de verschiddene Servicer a Redaktiounen am leschte Joer.

Programm

Dossieren

  • Dossier: Relatiounen tëscht Portugal a Lëtzebuerg

    Haut ass et den zweeten a leschten Dag vun der Staatsvisitt a Portugal. Eng grouss Lëtzebuerger Delegatioun ass den Ament zu Lissabon. An eisem Dossier fannt dir all eis Bäiträg an Artikelen iwwer d'Theema.

  • De Krich an der Ukrain

    De 24. Februar 2022 huet Russland d'Ukrain militäresch iwwerfall. Déi westlech Länner hu mat Sanktioune reagéiert, Millioune vu Leit sinn aus der Ukrain geflücht.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen