Filmkritik Horse Girl vum Jeff Baena

Liicht iwwerduerchschnëttlech kleng budgetéiert Genre-Indiefilmer fannen an der Reegel net méi de Wee op de groussen Ecran. An am Festivalscircuit ass wierklech kee Su ze maachen. Dofir ass de Wee op eng Streamingplattform méi einfach. "Horse Girl" ass esou e Film, deen zanter eppes méi wéi enger Woch op Netflix disponibel ass.

Tom Dockal / cbi

Horse Girl
Foto: IMDb

D'Duplass-Bridder sinn Dausendsassaen. Allebéid si si Schauspiller, allebéid produzéieren si an hu scho mol déi eng oder aner Serie kreéiert. Den Jay Duplass huet z. B. an "Transparent" matgespillt, de Mark Duplass huet "Togetherness" kreéiert an allebéid hu sech elo als Produzenten hanner de Film "Horse Girl" gestallt.

Dës nei Realisatioun vum Jeff Beana, dem Mann hanner de relativen amerikaneschen Indiehits wéi "The Little Hours" a "Life After Beth", huet net just nëmmen um Regiestull gesiess. D'Dréibuch huet hien zesumme mat der Alison Brie, der Vedette vum Film, geschriwwen.

Iergendeppes stëmmt net

Si inkarnéiert déi introvertéiert Sarah. Introvertéiert sief op dëser Plaz einfacherhalber dat ausgewielten Adjektiv. Hir sozial Kompetenze sinn net déi ausgeräifsten. D'Sarah schafft mat vill Freed an engem Bastelbuttek, bréngt vill Gedold a Sensibilitéit mat Clienten op an huet e gudde Rapport mat hirer Cheffin, vun der Molly Shannon gespillt.

Mee do dernieft schéngt si wéineg Frënn ze hunn. Si ass zwar am Zumba-Cours an huet eng Colloque, mee esou richteg connecten deet si mat kengem. Mee et ass net just dat. Iergendeppes stëmmt net mat hir. Spéitstens wéi de Frënd vun der Colloque d'Sarah nuets gesäit schlofwandelend op eng wäiss Mauer ze stuerken, ass dat kloer. Mee wat et ass, dat versicht de Film zum Theema ze maachen.

"Horse Girl" versicht Froen an de Raum ze stelle wéi: Wéi fillt et sech un, wann een eppes wouerhëlt, wat manifestement soss kee wouerhëlt? Wéi ass et, wann ee mam Gefill lieft, datt engem säi Gehier massiv Streech spillt? An esou weider an esou virun.

D'Alison Brie, wéi gesot Co-Zeenaristin vum Film, huet sech anscheinend autobiographesch un hirer eegener Familljegeschicht inspiréiert an där hirer Vergaangenheet mat Geeschteskrankheeten.

Vag an diffus

Dat ass u sech e ganz éierbare Sujet fir d'Actrice. A si gëtt och eng méi wéi zolidd Prestatioun of. Just: dat geet leider net duer. Well wann d'Dréibuch bei esou eppes net stëmmt, da kënnen de gudde Geste an duerch an duerch motivéiert Schauspiller d'Saach an der Reegel och net retten. An ze verantworten huet dat zum Deel d'Alison Brie och selwer.

Déi éischt hallef Stonn etabléiert sech de Film nämlech als e Film, deen eng sozial mëttelméisseg kompetent Fra am Mëttelpunkt huet, mat där een zimmlech séier zähneknirschend Matleed empfënnt, laang éier si vu Verschwierungstheorien, Paranoia an Angschtzoustänn iwwerrumpelt gëtt. Well genee an déi Richtung geet de Film iergendwann. Et gëtt ëm Alien-Entféierungen, ongekläerten Zäitspréng a Paralleluniversumen. Mee dat alles bleift immens vag an diffus.

Wat wëllt de Film?

An deementspriechend diffus bleift dann och, op wat de Film erauswëllt. Ass et e Kommentar an/oder Ausernanersetzung zum Theema Depressioun an Angschtzoustänn, verpaakt an engem Film, deen d'Genrecodë vun enger Plaz op eng aner schift oder ass et de geneeë Géigendeel?

Et ass net kloer genuch, wéi bei "A Beautiful Mind" vum Ron Howard, dee Schizophrenie zum Theema hat, mee et ass och net konsequent duerchernee genuch, fir datt ee sech wéi d'Haaptprotagonistin an de Realitéitsniveaue verléiere wëllt. An ob et herno Ausserierdescher sinn um Schluss, déi fir alles verantwortlech sinn, ass dem Spectateur just nach egal.

An der Mediathéik:

Kultur / / Tom Dockal
Lauschteren

Méi zum Thema

matthias et maxime Filmkritik
Nei am Kino

Ëm Léift a sexuell Identitéit geet et a "Matthias et Maxime". Et ass schonn deen aachte Film vum jonke Kanadier Xavier Dolan, deen och selwer matspillt. Erstaunlech onausgeräift a schlecht duerchduecht.

Birds of prey Filmkritik
Nei am Kino

"Birds of Prey" ass déi zweet Verfilmung mam weibleche Komik-Personnage Harley Quinn. D'Potential fir e Slapstick-Freedefeier war do. Erauskomm ass eng konstipéiert Massewuer.

Deux Filmkritik
Nei am Kino

An der Lëtzebuerger Co-Produktioun "Deux" kämpfen zwou eeler lesbesch Frae géint d'Obstakelen, déi hirer Léift am Wee stinn. An den Haaptrolle sinn d'Barbara Sukowa an d'Martine Chevallier.

Miss Americana
Filmkritik

Museksdocumentairen hunn eng joerzéngtelaang Traditioun. Och Netflix huet sech där Zort Film zougedréit. Mat "Miss Americana" rappt d'Taylor Swift hir eegen Narrativ fest u sech.

Programm

Praktesch Infoen

  • Nei Serie: Wellbeing

    Wellbeing

    Bleift gesond a monter zesumme mam 100,7. An eiser neier Serie "Wellbeing" wëlle mir Iech an dësen Zäite mat wäertvollen Informatiounen a Rotschléi begleeden. 

Dossieren

  • Coronavirus

    Den neiaartege Coronavirus Sars-CoV-2 breet sech ëmmer méi aus. De Virus léist d'Krankheet COVID-19 aus. Wéi eng Mesurë gi geholl, a wéi een Impakt huet en op Lëtzebuerg?

  • Gratis ëffentlechen Transport

    Den ëffentlechen Transport zu Lëtzebuerg ass vum 29. Februar u gratis. Dat haten d'Majoritéitsparteien Enn 2018 esou decidéiert. An eisem Dossier fannt Dir all eis Artikelen zum Theema.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen