Festival de Cannes 2019 Eng reell imaginär Welt

Mat Cannes XR dediéiert de Filmfestival dëst Joer den immersiven Technologien eng eege Rubrik. Ënner den honnerten Experienze sinn och Lëtzebuerger Produktioune vertrueden. Technologië wéi 8K, 360 Grad oder Virtuell Realitéit sollen hei net just fir Professioneller zougänglech sinn. D'Maxi Pesch huet d'Experienz um 72. Filmfestival vu Cannes gemaach.

Maxi Pesch / cz

Cannes XR.JPG

Et ass schonn erstaunlech, dat Gefill, wierklech ze mengen op enger anerer Plaz ze sinn. Mam ganze Kierper. Um Minus 1 vum Palais du Festival gouf dëst Joer eng ganz Arkad mat Casquen installéiert. Do ka jiddweree seng eegen Experienz maachen, erkläert de Sébastien Lefebvre vun 360 Film Festival.

"Et ginn Experienzen, do ditt Dir just de Casque un, ouni Mouvement. Dat ass, wéi wann Dir an der Realitéit wiert, just datt Dir an enger komplett anerer imaginärer Welt sidd. Elo ginn et och schonn Experienzen, déi vill méi wäit ginn. Zum Beispill kënnt Dir wierklech d'Gefill hu mat engem Gleitschierm ze fléien oder mat Delfinen an enger Piscine ze schwammen. Dat hänkt e bësse vun den Installatiounen of, déi een ausprobéiert."

Och Lëtzebuerger Produktioune sinn dobäi, wéi zum Beispill "Ayahuasca" vun der Produktiounsfirma A-Bahn. D'Experienz vun der Drog ouni drogéiert ze sinn, erkläert de Paul Bouschard vun Diversioncinema.

"Während der ganzer visueller Rees huet ee vill Halluzinatiounen. Et gesäit ee Schlaangen, Insekten, duerno ass een a Raim, déi wonnerschéi sinn oder an aneren, déi dech erdrécken. Zum Beispill ass een an engem Moment an enger Liichtkathedral, kuerz drop am Land vun den Doudegen. Alles dat ass d'Experienz vun de Leit, déi déi Drog wierklech huelen."

Technologië wéi d'8K Opléisung, déi Reell oder Augmentéiert Realitéit hätte sech an de leschte Jore séier weiderentwéckelt an hätten eng Zukunft viru sech, mengt de Sébastien Lefebvre.

"Et geet duer, datt ee gesäit, datt ëmmer méi Arkaden opginn. Ech mengen, datt et am Gaangen ass sech gutt ze developpéieren. Elo sinn d'Casquen och vill méi agreabel, et huet ee manner d'Gefill, datt een op engem Boot ass."

Elie Levasseur

Niewent der Arkad, wou een ausprobéiere kann, ginn zu Cannes um Marché vum Festival während sechs Deeg Konferenze ronderëm de Sujet organiséiert. Net nëmme Professioneller an deem Beräich sollen ugezu ginn, erkläert den XR Programmchef Elie Levasseur. Mat Cannes XR soll en Ekosystem kreéiert ginn.

"Haut huet een en Ekosystem vu Professioneller an deem Beräich. Mee et ginn ëmmer méi Produzenten, Artisten an Industrieller, déi sech op dës nei Technologië spezialiséieren. An et sinn déi Leit, déi mir och wëllen unzéien."

An der Mediathéik:

Kultur / / Maxi Pesch
Lauschteren

Programm

  • Iwwer Mëtteg

  • On air

    Resonanzen

  • Spektrum

  • Ënnerwee

  • Time Out

Dossieren

  • Verfassungsreform

    D'Verfassung vun 1868 soll duerch eng nei Verfassung ersat ginn. 2009 gouf dëse Reformprozess formell lancéiert an nach ass d'Aarbecht net ofgeschloss. Et ass nach e Referendum iwwer den neien Text geplangt.

  • Literaturfestival "étonnants voyageurs"

    Iwwer de Päischtweekend stoung d'Literatur aus der ganzer Welt, awer och de Film an d'Ausstellungen am Mëttelpunkt an der klenger bretonescher Festungsstiedche Saint Malo.

Communiquéen

  • Un nouveau directeur pour la radio 100,7

    Lors de sa réunion du mardi 26 mars 2019, le Conseil d'administration de l'Établissement de Radiodiffusion Socioculturelle a nommé Marc Gerges comme nouveau directeur de la radio 100,7.

  • radio 100,7 revue par ses pairs

    A la demande de la radio 100,7, l'Union Européenne de Radio-Télévision a procédé à une "revue par les pairs" des opérations de la radio 100,7.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen