Oscars 2020 Academy Awards: "Parasite" ass de grousse Gewënner

Kuerz virun hallwer 6 de Méindeg de Moien ass zu L.A. d'Verdeelung vun den Academy Awards op en Enn gaangen. Hollywood huet sech ofgefeiert a mat gëllene Statuette beworf. Den Oscaren. Den Tom Dockal war de Moie beim Simon Larosche fir de Palmarès vun den Oscaren ze kommentéieren. Well bei allem Op-d'Schëller klappen ass et zu enger Sensatioun komm.

Tom Dockal / cz

D'Equipe vum Film Parasite
picture alliance / photoshot

Simon Larosche: "Parasite" vum Süd-Koreaner Bong Joon Ho ass laut der Academy de beschte Film vum Joer. "Parasite" - ass dat immens oder ass dat immens?

Tom Dockal: Dat ass immens, well eng richteg Iwwerraschung am gudde Sënn vum Wuert, well een dovunner ausgaangen ass, dat de Film just den Oscar vum Beschten Internationale Film géif mat Heem huelen.

Dat hat ee sech esou wuel net ganz erwaart?

Nee, an deem Ausmooss huet sech dat keen erwaart. Well, "Parasite" huet eben net just nëmmen an der Kategorie vum Beschte Film an Internationale Film gewonnen, mee och an de Kategorië Bescht Dréibuch a Bescht Regie. An et war beim Regiepräis, dat de Bong den Ament vum Owend geliwwert huet.

Véier Oscare si vun der Quantitéit u sech net esou iwwerraschend?!

Dat ass wouer, mee eben déi véier Oscaren un dee Film. Dat ass iwwerraschend. An der Geschicht vun den Oscaren huet nach ni e südkoreanesche Film gewonnen. "Parasite" ass domat och deen éischte Film - net an englescher Sprooch - deen den Haptpräis gewonnen huet. Esouguer "The Artist" - e Stommfilm - huet ganz zum Schluss ee Saz op englesch!

A wéi ass de Palmarès soss ausgefall?

De Joaquin Phoenix krut fir seng Verkierperung vum Joker den Oscar fir déi beschten Haaptroll. Als bescht Haaptduerstellerin ass d'Renée Zellweger fir de Film "Judy" geéiert ginn.

De Brad Pitt krut e bëssen iwwerraschend den Oscar fir déi bescht Nieweroll am Quentin-Tarantino-Film "Once Upon a Time in Hollywood".

De Präis fir déi bescht Niewenduerstellerin ass un d'Laura Dern gaangen, fir hir Roll am Film "Marriage Story" vun der Noah Baumbach.

"1917" vum Sam Mendes war nach bis virun e puer Deeg bei de Bookies de grousse Favorit! Wat ass do geschitt?

De Film krut zwar am Ganzen dräi Oskaren, dat awer an den éischter manner wichtege Kategorië "Bescht Kamera- a Bildgestaltung", fir déi Bescht visuell Effekter a fir de beschte Soundmixing.

An der Mediathéik:

Kultur / / Tom Dockal
Lauschteren

Méi zum Thema

Marriage story Filmkritik
#Venezia76

De Woody Allen vum 21. Joerhonnert liwwert fir Netflix e Scheedungsfilm of. An den Haaptrolle sinn d'Scarlett Johansson an den Adam Driver. Den Tom Dockal huet de Film zu Venedeg gesinn.

Parasite
Festival de Cannes 2019

"Parasite" ass eng südkoreanesch Komedie, déi de Publikum zu Cannes mat engem Laachen op de Lëpsen aus de Säll goe gelooss huet. Den Thierry Besseling war de Film fir eis kucken.

Programm

Praktesch Infoen

Dossieren

  • Coronavirus

    Den neiaartege Coronavirus Sars-CoV-2 breet sech ëmmer méi aus. De Virus léist d'Krankheet COVID-19 aus. Wéi eng Mesurë gi geholl, a wéi een Impakt huet en op Lëtzebuerg?

  • Gratis ëffentlechen Transport

    Den ëffentlechen Transport zu Lëtzebuerg ass vum 29. Februar u gratis. Dat haten d'Majoritéitsparteien Enn 2018 esou decidéiert. An eisem Dossier fannt Dir all eis Artikelen zum Theema.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen