Kino De Bertrand Tavernier ass dout
De Bertrand Tavernier, e "grand monsieur" vum franséische Kino, ass dout. De Cineast ass am Alter vun 79 Joer gestuerwen. Am Laf vun enger laanger Karriär hannert der Kamera huet den Tavernier eng diversifizéiert Filmographie hannerlooss: historesch Filmer, Krimien, zäitgenëssesch Dramaen...
Ënnert de Filmer, vun deenen der vill mat Präisser gekréint goufen, kann een zum Beispill "L'horloger de Saint-Paul", "Coup de torchon", "Le Juge et l'assassin", "L'Appât", "L.627" oder nach "Capitaine Conan" ervir hiewen. De Philippe Noiret war säi Fetisch-Acteur.
De politesch lénks engagéierte Bertrand Tavernier war och bekannt fir seng Beméiungen zugonschte vum filmesche Patrimoine. Hie gëlt iwwerdeems als Referenz a Punkto amerikanesche Kino.
An deene leschte Joren hat hien ënnert anerem eng Kollektioun vun amerikanesche Western-Romaner beim franséische Verlag Actes sud geleet. Dat war och d'Theema vum Interview, deen de Michel Delage 2019 um Festival "Etonnants voyageurs" zu Saint-Malo mam Bertrand Tavernier gemaach hat.
Lauschtert dee ganzen Interview mam Bertrand Tavernier vun 2019
Méi zum Thema
De Bertrand Tavernier iwwer klassesch Western-Romaner
De franséische Filmegisseur leet bei den Editions Actes Sud eng Kollektioun vu Klassiker aus der Western-Literatur. De Michel Delage huet zu Saint-Malo mat him iwwer dee Genre geschwat.
