Nei am Kino Dat schlecht Gewësse vum fréieren Diktator

"La Llorona" vum Jayro Bustamante behandelt den Trauma vun der Militärdiktatur am Guatemala, aus der Perspektiv vun den Täter. De Verweis op eng mythesch Figur schaaft en Hauch vun Iwwernatierlechem.

Michel Delage

Filmkritik La Llorona
D'Déngschtmeedchen Alma (María Mercedes Coroy) - Foto: La Casa de Producción

Wéinst Genozid un der Maya-Populatioun gëtt de Generol Enrique Monteverde, fréieren Diktator vu Guatemala, viru Geriicht fir schëlleg gesprach. Allerdéngs huet d'Verfassungsgeriicht dat Urteel nees gekippt, wat massiv Protester ausléist. Den eelere Monteverde verschanzt sech mat senger Famill an engem Bodyguard a senger Villa, déi Dag an Nuecht vu Manifestante belagert gëtt. An där gespaanter Situatioun gëtt dann een neit Déngschtmeedchen aus der Maya-Ethnie engagéiert. Mee wat weess ee scho vun där jonker Alma?

"La Llorona" ass den drëtte Film vum guatemaltekesche Realisateur Jayro Bustamante. Et ass nach kee Joer hier, datt säin absolut iwwerzeegenden "Temblores" - een Drama iwwer dat verstéiert Verhältnis zur Homosexualitéit am ultrareliéise Guatemala - op eisen Ecranen ze gesi war. Mat sengem neiste Film huet de Bustamante, Joergang 1977, säin Talent confirméiert.

Erscheinunge vum schlechte Gewëssen

Thematiséiert ginn hei d'Nowéie vun der bluddeger Diktatur am latäinamerikanesche Staat - aus der Perspektiv vun den Täter. Déi fréier Membere vun der Militärjunta riede sech zwar an, deemools Helden am Kampf géint de Kommunismus gewiescht ze sinn. Mee déi Fiktioun, déi si selwer net wierklech ze gleewe schéngen, zerbréckelt. De fréieren Diktator plot dat schlecht Gewëssen. Wat huet een och vun der Pensioun an der confortabeler Villa mat Gaart, wann dobaussen Dag an Nuecht Familljememberen a Kolleege vun Affer vun der Diktatur Kaméidi maachen oder stomm Portraite vun de Vermëssten an d'Luucht halen?

Nuets héiert den ale Monteverde och Geräischer, wéi eng Fra, déi kräischt ... Bilt hie sech dat nëmmen an? D'Halluzinatioune schénge méi konkret Zich unzehuelen, wéi op eemol dat neit Déngschtmeedchen (María Mercedes Coroy) an d'Haus kënnt, eng jonk Fra, déi wéi eng iwwernatierlech Presenz wierkt ...

De Mythos vun der Fra, déi kräischt

De Jayro Bustamante gräift d'Legend vun der Llorona op, der Fra déi kräischt. Dës Figur aus dem latäinamerikanesche Folklor - eng Fra, déi hir Kanner soll erdronk hunn an et duerno bereit - huet am Laf vun der Zäit verschidde Funktiounen erfëllt: ënner anerem als Warnung fir d'Männer a fir d'Fraen, datt si hire respektive Partner sollen trei bleiwen, oder och als Identifikatiounsfigur fir ënnerdréckte Gruppen aus der Gesellschaft, dorënner Fraen an déi indigen Ethnien. Am Film ginn dës Funktiounen all zu engem villschichtege Ganze vernetzt.

"La Llorona" ass virun allem och e Film iwwer Fraen. Si verbënnt eng gewësse Solidaritéit ënnerteneen, sief et, datt si op der Säit vun der ënnerdréckter Minoritéit sinn, sief et zur Famill vum fréieren Diktator gehéieren. Well och d'Frae verkierpere gewëssermoossen dem Monteverde säi schlecht Gewëssen. Geschützt ass hie mol net méi a sengem eegenen Haus, dat prekäert Gläichgewiicht ass drop an drun ze kippen.

En Hauch vun Iwwernatierlechem

D'Duechter stellt de Papp an d'Mamm zur Ried, an d'Enkelin, nach e Kand, schléisst mat engem symbolesche Geste mam Grousspapp of: déi jonk Generatioune schénge sech vun der Diktatur wëllen ze distanzéieren. Deen interessantste Personnage ass dem Monteverde seng Fra Carmen (Margarita Kenéfic). Dat schlecht Gewësse manifestéiert sech bei hir a Form vun obsessiven Albdreem. Hire fanatesche reliéise Glawen hält si nëmmen eng Zäit iwwer Waasser - och déi Fassad zerbréckelt lues a lues, virop de Glawen un hire Mann ...

"La Llorona" ass e komplexe Film, dee mat der Déift vun de Biller spillt, fir op d'Wourecht am Hannergrond hinzeweisen. Déi réi, kal Faarwe schafen e Gefill vu Malaise an en Hauch vun Iwwernatierlechem schwieft permanent iwwer dem Jayro Bustamante säi Wierk, ee weidert aus senger nach klenger Filmographie, dat alt nees absolut kuckenswäert ass.

An der Mediathéik:

Kultur / / Michel Delage
Lauschteren

Méi zum Thema

1917
Nei am Kino

Dem Sam Mendes säi Krichsfilm "1917" ass spektakulär an usprochsvoll. De Spectateur gëtt op eng Faart op der Achterbunn matgeholl. Viru Kuerzem gouf de Film mat zwee Golden Globes ausgezeechent.

wild goose lake FILMKRITIK
Nei am Kino

"The Wild Goose Lake" ass e Film noir/Gangsterfilm vum chinesesche Realisateur Diao Yinan. D'Spill mat de Codë vum Genre a besonnesch d'Bildästheetik hiewen de Film op en héijen Niveau.

Programm

Praktesch Infoen

  • Nei Serie: Wellbeing

    Wellbeing

    Bleift gesond a monter zesumme mam 100,7. An eiser neier Serie "Wellbeing" wëlle mir Iech an dësen Zäite mat wäertvollen Informatiounen a Rotschléi begleeden. 

Dossieren

  • Coronavirus

    Den neiaartege Coronavirus Sars-CoV-2 breet sech ëmmer méi aus. De Virus léist d'Krankheet COVID-19 aus. Wéi eng Mesurë gi geholl, a wéi een Impakt huet en op Lëtzebuerg?

  • Gratis ëffentlechen Transport

    Den ëffentlechen Transport zu Lëtzebuerg ass vum 29. Februar u gratis. Dat haten d'Majoritéitsparteien Enn 2018 esou decidéiert. An eisem Dossier fannt Dir all eis Artikelen zum Theema.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen