European Union Prize For Literature Celebratioun vum Geschichten-Erzielen
Unerkennung iwwer geographesch a sproochlech Grenzen eraus. Dat ass eent vun den Haaptziler vun den dräi Organisatiounsorganer vum europäesche Literaturpäis. De European Writer's Council, d'Federation of European Publishers an d'European and International Booksellers Federation géif duerch d'Iwwerreechung eng transversal Visioun vun de Schrëftsteller kréien. Eng wichteg Viraussetzung fir d'Aarbecht am Alldag.
De Literaturpräis vun der Europäescher Unioun wier fir d'Organisateuren eng Geleeënheet, déi een net all Dag gebuede kritt. De Jean-Luc Treutenaere, President vun der Federatioun vun de Librairen explizéiert, datt et fir de Libraire existenziell ass de Produit ze kennen, deen ee wëll verkafen. Duerch d'Iwwerreechung vum Literaturpräis géif een awer och eng transversal Visioun vun den 12 Schrëftstellerinnen a Schrëftsteller kréien, déi aus engem gréisseren Europa géife kommen.
"Et war een tierkeschen an een albanesche Schrëftsteller do. Also keng Leit aus dem Häerz vun Europa. Fir eis ass dat eng exzeptionell Ëffnung. Et ass eng kleng Duerstellung vu wat et bedeit Libraire ze sinn. Well mir mussen all Dag aus onendlech ville Bicher déi eraussichen, déi mir eise Cliente weider vermëttelen, sou datt si sech fir aner Kulturen a Welte kënnen opmaachen."
"Goethe, Voltaire, Cervantes. All dat ass Europa."
Am Laf vun der Iwwerreechungszeremonie vum EU-Literaturpräis hunn déi 12 Schrëftstellerinnen a Schrëftsteller an hirer Sprooch gelies. Mee och d'Presidente vun de Federatiounen hunn d'Geleeënheet genotzt fir hir Messagen duerchzeginn. Dem Jean-Luc Treutenaere, President vun den europäesche Librairen no, géif d'Kultur Europa ausmaachen an net d'Wirtschaft. Et wier an der Kultur, wou mir gemeinsam Wuerzele géife fannen, mengt de Jean-Luc Treutenaere. "Goethe, Voltaire, Cervantes. Alles dat ass Europa. An an dëser europäescher Kultur erkenne mir eis erëm."
An dat obwuel déi 12 ausgezeechent Schrëftstellerinnen a Schrëftsteller an hire Wierker vill verschidden Theme géifen adresséieren, seet de Jean-Luc Treutenaere.
"Et ass erstaunlech, datt e Schrëftsteller aus dem Montenegro iwwer de Marquis de Sade schreift. Oder, datt eng griichesch Schrëftstellerin iwwer d'Migratioun tëscht den USA a Griicheland schreift. Dat ass den onglaubleche Räichtum vun Europa, dee mir verdeedege wëllen."
An der Mediathéik:
LauschterenMéi zum Thema
D'Weltgeschicht op Siebenbürgesch
De Claudiu M. Florian ass ee vun den Auteuren, dee mam Europäesche Literaturpräis priméiert gouf. A sengem Buch gesäit een d'Welt aus den Ae vun engem Bouf aus Siebenbürgen.
Jonke Schrëftsteller op der Héicht
De Belsch Christophe Van Gerrewey ass ee vun zwielef Laureate vum Literaturpräis vun der Europäescher Unioun (EUPL). Äusgezeechent gouf den Architektur-Theoretiker fir säin éischte Roman “Op de Hoogte”.
Eng Welt ouni modern Technologien
Direkt mat sengem éischte Buch huet de sloweneschen Auteur Jasmin B. Frelih den EUPL gewonnen. A séngem Roman mussen d'Personnage sech an enger Welt erëm fannen, an där all Kommunikatioun brooch läit.
Meenung
Pärele virun d'Sai
D’Soirée fir d’Iwwerreechung vum Literaturpräis vun der Europäescher Unioun war pompös. Vläicht ze pompös, mengt d'Nathalie Bender.
