Netflix Am Bible Belt ass der Däiwel lass

Bigotterie, Korruptioun, Perversioun, Gewalt: domat hätt ee scho bal Knockemstiff beschriwwen, e Kaff am US-Staat Ohio, esou wéi et am Film duergestallt gëtt. Am Fong kéint d'Uertschaft mat hiren Awunner, ënner deenen natierlech och éierlech Mënsche liewen, stellvertriedend si fir de ''Bible Belt'', dëse massive Block vu Südstaaten, an deem de Konservatismus an den evangelesche Protestantismus déi sozial Bezéiunge prägen. Den amerikaneschen Drama ''The Devil All The Time'' spillt nu mol zu Knockemstiff, well do den Donald Ray Pollock, op deem säi Roman dëse Film baséiert, opgewuess war.

Als schonn ufanks Fofzeger, no enger Karriär als Aarbechter a Camionschauffer, hat de Pollock ugefaange Bicher ze schreiwen an ze verëffentlechen. Fir d'éischt 2008 d'Kuerzgeschichtesammlung ''Knockemstiff'', dräi Joer drop da säin éischte Roman ''The Devil All The Time''. An der Verfilmung vu sengem eegene Wierk duerch den Antonio Campos schwätzt de Schrëftsteller déi rau a gedëlleg Off-Stëmm.

Erzielt gëtt d'Geschicht vun enger ganz bescheidener Famill iwwer zwou Generatiounen, am Zeeche vun der Sënn, am Schied vum Kräiz, dat wéi en Damoklesschwäert iwwer den eenzele Schicksaler hänkt.

Sozialen Determinismus

De Film ass ganz kloer an dräi Deeler strukturéiert. An deenen zwou éischte Partië kritt de Spectateur gewisen, wéi sech Weltbild a Verhalensweise vu Generatioun zu Generatioun praktesch mechanesch reproduzéieren, déi gutt Eegenschaften a virun allem déi schlecht, déi de Mënsch an d'Verdierwe féieren.

Esou kritt de jonken Arvin Enn den 1950er Jore vu sengem Papp, engem traumatiséierte Veteran vum Zweete Weltkrich, dee mat der Zäit streng gleeweg ginn ass, virgelieft, wéi e Mann d'Problemer ze léisen huet: nom Motto ''Auge um Auge, Zahn um Zahn''.

De ganzen Enjeu vum drëtten a leschten Deel vum Film, d'Opléisung souzesoen, ass deen heiten: geléngt et dem Arvin (je no Alter: Michael Banks Repeta an Tom Holland) dësem Däiwelskrees ze entkommen? Ob et em dann elo geléngt oder net, versteet ee jiddefalls ganz séier, datt als Präis dofir Blutt wäert musse fléissen.

Éiwegen Däiwelskrees

D'Iddi vun engem ''ewigen Verdammnis", vun enger duerch e rosene Gott verhaange Bestrofung vun den duerch d'Ierfsënn gezeechente Mënschen, zitt sech wéi e blutt-roude Fuedem duerch de ganze Film. Illustréiert gëtt dëst reliéist Konzept duerch de Prinzip vun der Widderhuelung: Verhalensmusteren, déi vun den Elteren op d'Kanner iwwerdroe ginn; ëmmer erëm e Scharlatan (ënner anerem verkierpert vum Robert Pattinson), dee seng Priedegten op déi liichtgleeweg Gemeinschaft erof donnere léisst; dat tragescht Schicksal vun enger Mamm, dat och nees d'Duechter muss erleiden ...

Et ass de Krich, dee sech widderhëlt: nom Zweete Weltkrich, vun deem de Papp schrecklech Biller am Kapp zeréckbruecht hat, blitt dem Jong elo de Vietnamkrich - esou sécher wéi den Amen am Gebiet, oder, wéi e Personnage bemierkt: ''verschidde Mënsche goufe gebuer fir kënne begruewen ze ginn''.

Op d'Spëtzt gedriwwe gëtt de Widderhuelungsprinzip dann duerch eng Koppel vu Serie-Killer, eng Zort ''amants diaboliques'', déi hiert Onwiesen dreiwen: och si reproduzéieren hir Doten, déi si esouguer fotografesch festhalen, woumat dës symbolesch Bestrofungen vun all den zoufälleg ausgewielten Affer unhand vun den Negativen onendlech kënne multiplizéiert sinn - alt erëm d'Iddi vum Däiwelskrees.

Kann de Jong de Krees briechen?

Deen op Flashbacken a Flashforwarden opgebaute Montage dréckt dee selwechte Gedanken aus. Vun der Off-Stëmm gëtt een zum Beispill an enger Zeen gewuer, datt e bestëmmte Personnage, deen hei nach lieft, doropshi wäert verschwannen a siwe Joer méi spéit dout erëmfonnt ginn. D'Schicksal gëtt virewech geholl, et kann een net entkommen. Méi spéit am Film gëtt dee Prinzip awer ëmgedréit: nodréiglech kritt een d'Erklärung fir eng Schlësselzeen geliwwert - den Däiwelskrees gouf, entgéint allen Erwaardungen, gebrach!

''The Devil All The Time'' ass e kohärenten, zolidd opgebauten an alles an allem iwwerzeegende Film, deem et manner drëm gëtt, eenzel Personnagen ze verdéiwen, wéi d'Entwécklung vun enger ganzer Gemeinschaft nozezeechnen. Obschonn de Film an den 1950er a 1960er Jore spillt, ass seng Thematik brandaktuell, net nëmmen an engem amerikanesche Kontext.