Musek Vun der Long op d'Zong
Op Lëtzebuergesch kann een net iwwer Léift sangen, ouni datt et kitscheg kléngt. Englesch ass d'Sprooch vun der Pop-Musek. Sinn dat Fakten oder Viruerteeler? Mir hunn am Summer den Test gemaach.
Et ginn net vill Sänger, déi op Lëtzebuergesch sangen. Am Kader vun der Summerprogrammatioun 'Congés Annulés' vun de Rotonden hat de radio 100,7 véier Artistinnen an Artisten invitéiert, déi an hirer Mammesprooch gesong oder gerappt hunn. D'Resultat war erstaunlech villsäiteg.
Een evidente Choix war de Serge Tonnar. Hie séngt zanter 13 Joer op Lëtzebuergesch. Och de Corbi kennt ee just als Rapper an der Mammesprooch. D'Claudine Muno ass bekannt als Sängerin vu Monophona. Beim Concert an der Buvette vun de Rotonden huet d'Sängerin allerdéngs mat der Gittar lëtzebuergesch Protest-Lidder interpretéiert. A fir d'Kënschtlerin a Musekerin Catherine Lorent war et eng Première, fir just op Lëtzebuergesch ze sangen.
Mir hunn déi véier Concerte fir Iech als Dossier regruppéiert.
Claudine Muno: Keng Lidder iwwer Villercher a Beem
Den Optrëtt an de Rotondë war eng vun deene seelene Gelleënheeten, fir der Sängerin hir akustesch Protest-Lidder ze héieren.
Corbi: D'Hänn an d'Luucht!
De Lëtzebuergesche Rap-Pionéier live an de Rotonden. Virum Optrëtt erkläert hien, wéi hien dozou koum, an der Mammesprooch ze rappen. A wat Zacki-Zacki-Produktioune sinn.
Catherine Lorent: Fëschen a schéissen
An der Catherine Lorent hirem groussen Uewe gi ganz verschidde Musek-Stiler wéi Black Metal an Jazz matenee vermëscht. Hiren Optrëtt op Lëtzebuergesch war eng Première fir d'Kënschtlerin.
Serge Tonnar: Géint all kommerziell Logik
Och an der Mammesprooch kann ee Mëssverstane ginn. Virun allem vu Leit, déi mengen, si wäre besonnesch gutt Lëtzebuerger. De Serge Tonnar wënscht sech méi Konkurrenz, virun allem bei Liebeslidder.
