De radio 100,7 Archiv Op Besuch: bei der Lotty Braun-Breck

De Claude Mangen war am Dezember 2003 op Besuch bei der Lotty Braun-Breck. Dës Damm huet vill fir d'Konschtzeen zu Lëtzebuerg gemaach. Ënner anerem huet si bei Expositiounen an der Villa Vauban geschafft, Artikele fir d'Zäitschrëft Nos Cahiers geschriwwen, vill iwwer de Claus Cito recherchéiert, geschriwwen a Konferenzen an Ausstellungen iwwer hien a säi Wierk gehalen. Mee den Zweete Weltkrich huet och hiert d'Liewen net einfach gemaach. Si koum am Mäerz 1943 an de Krichsdéngscht.

Jean Pierre Fiedler et Madame Lotty Braun-Breck
Jean Pierre Fiedler an d'Madamm Lotty Braun-Breck - Fotograf Don Jean Reitz © - copyright Photothèque de la Ville de Luxembourg

Op Besuch beim Claude Mangen war 2003 eng Damm, déi grouss Verdéngschter un der Entwécklung vun der Konscht zu Lëtzebuerg huet. Schonn a jonke Jore war d'Lotty Braun-Breck u Molerei a Skulptur interesséiert. Och d'Musek, méi genee de Piano, hat hir et ugedoen. Awer den Zweete Weltkrich huet hir artistesch Ambitiounen op d'Prouf gestallt. Eréischt méi spéit, an iwwer Ëmweeër, konnt si hir Ausbildung als Zeecheprofessorin maachen. Si huet op der Handwierkerschoul an um Institut Pédagogique Schoul gehalen.

D'Lotty Braun-Breck huet ë. a. bei Expositiounen an der Villa Vauban matgeschafft, a si huet Artikelen an der Kulturzäitschrëft Nos Cahiers publizéiert. Ganz besonnesch huet si sech dem Liewen a Wierk vum Sculpteur Claus Cito (1882-1965) ugeholl, sief et duerch Ausstellungen, Konferenzen oder mam Buch "Claus Cito und seine Zeit" vun 1995.

Op dësem Gebitt huet si remarkabel Verdéngschter. Si war Member vum CAL, dem Cercle Artistique Luxembourgeois a besonnesch am Beräich vun der Tapisserei, de Gobelinen, kreativ. Och huet si 25 Joer laang als Volontairin bei der Ligue HMC matgeschafft. Mat nach bal 80 Joer war déi jonk Damm 2003 ëmmer nach op ville Gebidder onermiddlech aktiv.

 

Net verpassen

Programm

Dossieren

  • Klimakonferenz zu Glasgow

    Déi gréissten Weltklimakonferenz zanter Paräis fënnt tëscht dem 31. Oktober an 12. November zu Glasgow statt. Fir eis op der Plaz ass eise Korrespondent Philip Crowther.

  • Verfassungsreform

    D'Verfassung vun 1868 soll duerch eng nei Verfassung ersat ginn. 2009 gouf dëse Reformprozess formell lancéiert an nach ass d'Aarbecht net ofgeschloss. Et ass nach e Referendum iwwer den neien Text geplangt.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen