UNO Weltwaasser-Rapport Besser Notzung vu Grondwaasser kéint Subsahara-Zon transforméieren

Lauschteren

Quasi guer keng Agrarflächen an der Subsahara-Zon an Afrika géife Grondwaasser notzen, an dat obwuel et an der Regioun grouss Quantitéiten un ënnerierdeschem Grondwaasser ginn, esou d'UNO an hirem annuelle Waasser-Rapport. Knapps dräi Prozent vun deenen Agrarflächen an der Subsahara-Zon wieren iwwerhaapt fir d'Irrigatioun equipéiert.

Dem Rapport no géif et an der Regioun genuch Grondwaasser ginn, fir d'Landwirtschaft ze transforméieren a fir d'Leit mat propperem Waasser fir hir Drénk- an Hygiènesbesoinen ze versuergen. Dat allerdéngs nëmme wann d'Ressource besser genotzt gëtt, esou d'Fuerscher.

An Afrika géif Grondwaasser net genotzt ginn, well net genuch an Equipement an Infrastruktur investéiert géif ginn. Donieft géif et u Fachleit an u spezifeschen Institutioune feelen. Et wier essentiell fir eng Expertis iwwer d'nohalteg Notzung vum Grondwaasser opzebauen, heescht et am Rapport.

Mee och wann d'Grondwaasser en Deel vun der Léisung kéint sinn, warnt den Oakland Institute virdrun, datt friem Staaten oder Konzerner d'Grondwaasser fir hir Zwecker notze kéinten. International Agrar-Entreprisë géife grouss wirtschaftlech Opportunitéte fir sech an Afrika gesinn. Entreprisë kréien dacks d'Rechter op d'Notze vu Land a Waasser accordéiert.