Carola Rackete am Europaparlament Tëschent Heldin an Haassfigur

Eng engagéiert Ried, relativ niichtern virgedroen, déi et awer vum Contenu hier a sech huet.

D'Carola Rackete hëlt d'Europadeputéiert mat op d'Mier, wou sech ëmmer nees virun hiren Ae grausam Zeenen ofspillen.

"Ech erënnere mech, wéi lauter Kierper ronderëm eist Schëff geschwomme sinn.", sou d'Kapitänin vun der Sea Watch. "Ee vun eise Volontairen, de Martin, huet de Kierper vun engem klenge Kand aus dem Waasser gezunn. Et war, wéi wann hien den Doud net akzeptéiere konnt. Hien huet net opgehale fir d'Kand ze sangen, wéi wann et nach um Liewe wier."

"Empfaangen, wéi mat der Pescht u Bord"

Hir schlëmmsten Experienz awer wier et gewiescht, wéi si 17 Deeg laang mat iwwer 50 Refugiéen u Bord am Mëttelmier ronderëm geiert ass. D'Decisioun, ouni Autorisatioun u Land ze goen, huet si missen huelen, well d'Situatioun um Schëff sech zougespëtzt huet.

"Ech gouf empfaangen, wéi wann ech d'Pescht u Bord hätt, an net mat Leit, déi mat hirer Kraaft um Enn sinn an Hëllef brauchen", sou d'Carola Rackete. "Et war haart eng europäesch Biergerin ze sinn, an deenen Deeg, ech hu mech geschummt."

An dann d'Fro direkt un d'Deputéiert geriicht: "Wou waart dir, wéi mir iwwer all Kanäl no Hëllef geruff hunn?"

Trotzdem gouf et nom Speach Standing Ovation am Sall. Dat ass seelen an enger Kommissiounssitzung am Europaparlament.

"Dir sollt eigentlech am Prisong setzen"

Allerdéngs bréngen d'Interventioune vu verschiddenen Deputéiert dono d'Stëmmung nees op de Buedem vun der europäescher Realitéit.

"Dir hutt et net verdéngt als Heldin gefeiert ze ginn, Dir schafft mat Schleiser zesummen", reprochéiert d'Anna Tardino vun der rietser Lega Nord der Kapitänin.

De Belsch Tom Vandendriesche vum Vlaams Belang ass ganz d'Accord: "Dir sidd Deel vun engem kriminelle Reseau, dofir sollt Dir eigentlech nei hei, mee am Prisong sëtzen".

Dat sollte Geriichter decidéieren, äntwert dorop den Däitsche Gréngen Erik Marquardt. "D'Gesetzer ginn enger Kapitänin d'Recht an een Hafen anzelafen, wa si an Nout sinn".

Genee dat ass awer an der Praxis den Ament net onëmstridden an der EU.

Ufanks der nächster Woch kommen déi responsabel Ministeren zu Lëtzebuerg zesummen, fir op en Neits doriwwer ze diskutéieren, wéi mat Leit, déi um Mier gerett ginn, soll verfuer ginn.

Um Dësch läit een Accord, dee virun zwou Woche véier EU-Länner ofgeschloss hunn.

Deemno géifen d'Refugiéen fir d'éischt an een Hafen an Italien oder op Malta bruecht an dann no engem Schlëssel op verschidden EU-Länner verdeelt ginn. Wa sech da Fräiwëlleger genuch fannen.

Libyen - ee Partner oder eng Gefor?

An där Deklaratioun vu Malta sti Sätz, déi vu Säite vun Aktiviste wéi der Carola Rackete als kriddeleg gesi ginn.

Zum Beispill deen, datt all Rettungsschëff misst den Instruktioune vun de Garde-Côte follegen, och deene vu Libyen.

"Déi libesch Autoritéite wäerte mir da virschreiwen, datt ech d'Leit an een Hafen a Libyen brénge soll. Geriichter hunn awer unerkannt, datt dat keng sécher Plaze sinn", seet dozou d'Carola Rackete.

D'Fro awer, wéi ee mat Libye verfuere soll, ass och eng, déi an der EU ëmstridden ass.

"D'Positioun vun der EU ass déi, datt Libye keng sécher Plaz ass, wouhi Schëffer, déi ënner engem europäesche Fändel fueren, Leit sollten hibréngen", betount zwar de Michael Shotter am Numm vun der Europäescher Kommissioun op Nofro vu verschiddenen Europadeputéierten.

D'Schëffer vun de libesche Garde-Côtë maachen awer genee dat. Forméiert ginn déi libesch Beamten ënner anerem vun der EU.

Och dat ass Deel vun der ëmstriddener a widderspréchlecher EU-Politik am Mëttelmier.

An Zesummenaarbecht mat Euranet Plus, dem gréissten europäesche Radio-Reseau fir EU-Aktualitéit.