Corona-Pandemie Regierungsrot: Gëltegkeetsdauer vu Corona-Tester soll reduzéiert ginn

PCR-Tester sollen 48 amplaz vun elo 72 Stonne gülteg sinn. Antigentester nach 24 amplaz vun elo 48 Stonnen. Ee Méindeg ass ee weidere Regierungsrot fir zousätzlech Covid-Restriktioune ze décidéieren.

Pia Oppel

Corona-Test

D'Regierung huet de Moien decidéiert fir d'Gëltegkeetsdauer vun de Corona-Test-Zertifikater ze reduzéieren: Wéi et an engem Communiqué heescht, solle PCR-Tester 48 amplaz vun elo 72 Stonne gülteg sinn. Antigentester sollen hirersäits nach 24 amplaz vun elo 48 Stonne valabel sinn.

Leit, déi net geimpft sinn, misste sech deemno méi dacks teste fir ee gültege CovidCheck-Certificat ze hunn. Eng entspriechend Ännerung vum Covid-Gesetz soll zäitno op den Instanzewee geschéckt ginn.

D'Regierung recommandéiert dann och den Asaz vu Masken a Schnelltester fir Visiteuren an Alters- a Fleegeheemer - dëst zousätzlech zum CovidCheck-System. Den Ament géifen et a fënnef Strukture fir eeler Leit am Ganzen néng positiv Covid-Fäll, sot eis d'Familljeministerin Corinne Cahen op Nofro hin.

Ee Méindeg ass ee weidere Regierungsrot fir zousätzlech Covid-Restriktiounen ze decidéieren. Am Virfeld ginn ee Méindeg de Moien d'Sozialpartner consultéiert.

"Exponentiell Dynamik"

Eng Suerg bleift deen ze niddregen Impftaux, anerersäits kéinten d'Restriktiounen och dorobber zilen, fir d'Kontakter nees ze reduzéieren an esou d'Verbreede vum Virus ze bremsen.

D'Infektiounszuelen hu mëttlerweil eng "signifikant exponentiell Dynamik" heescht et an engem neie Rapport vun der wëssenschaftlecher Covid-19-Task-Force. D'Zuel vun den Hospitalisatioune wier den Ament konstant. Et wier an nächster Zäit awer mat méi Covid-Patienten an de Spideeler ze rechnen, wann déi sozial Interaktiounen um selwechten Niveau bleiwen.

Méi zum Thema

Net verpassen

Programm

Dossieren

  • Saint-Malo: "Étonnnants Voyageurs"

    Saint-Malo ass déi Plaz, wou déi sougenannt ''littérature-monde'' gefeiert gëtt. Den 100,7 war bei der leschter Editioun vum Festival Étonnants Voyageurs am Juni dobäi.

  • Dossier: Cannabis-Legalisatioun

    Nach am Laf vun dësem Joer soll e legale Kader ausgeschafft ginn, fir e staatlech kontrolléierten Ubau vu Cannabis fir medezinesch Zwecker zu Lëtzebuerg méiglech ze maachen.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen