Onparteiesch Roll vum Chamberspresident soll am Reglement verankert ginn

Lauschteren

Viru fënnef Wochen hat d'CSV-Fraktioun an engem Bréif un de Chamberspresident Fernand Etgen gefrot, datt iwwer ënner anerem d'Roll, d'Neutralitéit an d'Impartialitéit vun der Chamber-Presidence soll diskutéiert ginn.

Dat, well si heiansdo d'Impressioun haten, datt de Chamberspresident awer méi regierungs, - oder majoritéits-frëndlech war.

Majoritéit an Oppositioun weise sech zefridden

D'Reglements-Kommissioun vun der Chamber huet sech mat engem Text befaasst, fir d'Neutralitéit an d'Impartialitéit vum President fest ze schreiwen, erkläert den Deputéierte vun der Piratepartei Sven Clement.

"Et muss eng Omissioun gewiescht sinn an der Vergaangenheet, datt dat net dra stoung. An dat ass awer och vun alle Parteien - inklusiv och dem President - begréisst ginn, fir nach eng Kéier kloer ze stellen, datt de President de President vum ganzen Haus ass."

De Gilles Roth hofft, datt déi geplangten Upassung zu méi objektiven Debatten an der Chamber bäidréit.

"An da géifen och, mengen ech, verschidden écarts de conduiten, déi sech an der kierzester Vergaangenheet opbruecht hunn, och villäicht do éischter vermidde ginn."

Och op Säite vun der Majoritéit weist ee sech averstane mat der geplangter Prezisioun. Sou ass beispillsweis den LSAP-Fraktiounschef Yves Cruchten der Meenung, datt et eng gutt Saach wier, datt dat lo alles am neie Reglement kloer gestallt gëtt.

Un der Upassung gëtt nach geschafft

Zur Entscheedung, d'Neutralitéit an d'Impartialitéit festzeschreiwen, seet de Chamberspresident Fernand Etgen:

"Ech muss soen, datt ech selwer als Chamberspresident och frou sinn, datt déi do Diskussioun stattfonnt huet, wat mir eben d'Méiglechkeet gëtt fir Instrumenter an der Hand ze hunn, fir eben einfach dee Rôle esou ze erfëllen, wéi dat ebe verlaangt ass."

Den CSV-Co-Fraktiounschef Gilles Roth weist sech iwwerdeems och zefridde mat der Decisioun.

"Ech mengen, mir sinn an deem Sënn als CSV zefridden, well mir Satisfaktioun krut hunn. An et ass jo net nëmmen den Text eleng deen zielt: wann esou een Text an e Reglement afléisst, dann heescht dat jo och een neie Moment. An ech ginn dovun aus, datt Jiddwereen, deen do concernéiert ass, och mat sech selwer zu Chouer geet."

Um Text fir d'Upassung vum Reglement géif aktuell nach geschafft ginn, heescht et op Nofro hin.