Medien Nëmme Verléierer an der Affär Lunghi

Et kënnt vir, datt een sech als Journalist oder och als kritesche Beobachter an engem Artikel oder engem Kommentar iert. Dëst ass mir geschitt. Op dëser Antenn hunn ech de 6. Oktober d’Affär Lunghi kommentéiert an et ass mir gaangen, ewéi villen anere Leit. Ech hunn dat esou gegleeft, wat ech owes op der Televisioun gesinn hat.

De Reportage, deen am Nol op de Kapp gewise ginn ass, huet just eng Konklusioun zougelooss: Dat do geet esou net. Den Direkter vum Mudam war kloer als deen ze identifizéieren, deen am Fehler war, sech donieft beholl huet an eng Journalistin dobäi gehënnert huet, hir Aarbecht ze maachen.

Haut gesäit dëst e bëssen anescht aus. Och wann den Enrico Lunghi kloer iwwerreagéiert huet - säin Dernieft-Behuele gouf mëttlerweil och vum zoustännege Regierungskommissär aktéiert - ass dee ganzen Telesreportage anescht verlaf, wéi et den Nokuckerte gewisen ginn ass. RTL selwer huet dat ganz Filmréimaterial verëffentlecht an domat eigentlech de Beweis dofir erbruecht, datt den éischte Reportage nëmmen een Deel vun der Wourecht war. Dont acte.

Keng Gewënner

Eigentlech gëtt et an der ganzer Affär keng Gewënner. A gelidden huet bei ville Leit virun allem och d’Vertrauen an d’Medien. Wa manipuléiert gëtt oder bewosst Saachen anescht duergestallt ginn, fir Quoten ze maachen, ass dat ee bedenkleche Virgank.

Dobäi dierft et eigentlech net esouwäit kommen. Ëmmerhin gëtt et een Deontologiekodex, deen sech d’Journalisten hei am Land selwer ginn hunn. Dëse Kodex hunn an der Zäit déi nei Journalisten ëmmer esou ze soen als Guideline mat op de Wee kritt, wann se hir Pressekaart kruten.

An deem Kodex geet et ëm den Ëmgang mat der Informatioun, déi der Wourecht entsprieche muss, bis hin zum Ëmgang mat Drëttpersounen, där hir Würd a Perséinlechkeetsrechter respektéiert musse ginn. An dësem Kodex steet och, datt een d’Onscholdsvermutung, déi ominéis "présomption d’innocence" als Journalist respektéiere soll. Nach emol dont acte.

Wéi gesot an der Affäre Lunghi gëtt et kee richtege Gewënner. Et sollt ee vläicht, fir dann dach eppes Positives aus der Saach ze zéien, emol méi grëndlech iwwer alles dat nodenken, wat esou an deem Code de Deontologie steet, deen an dësem Joer zéng Joer krut.
Happy Birthday!