Nei Anti-Terror-Gesetzer no Attack zu Wien

Zwou Wochen no der terroristescher Attack zu Wien versicht déi éisträichesch Police weider d'Ëmstänn ze klären. Géint 21 méiglech Mattäter gëtt ermëttelt, zéng dovu setzen an Untersuchungshaft. Den Ugräifer selwer gouf bei dem Attentat vun der Police erschoss. Fir esou Attacken an Zukunft ze verhënneren, wëllt d'Regierung zu Wien elo d'Gesetzer verschäerfen. Dat stéisst awer op Kritik.

Stephan Polet (Wien) / cbi

De Sebastian Kurz
D'Regierung ëm de Sebastian Kurz huet nei Mesurë géint den Terrorismus virgestallt. Foto: picture alliance/Sven Hoppe/dpa-Pool/dpa

Wéi koum den Attentäter an den Zentrum vu Wien, a wou huet hie Waffen a Munitioun hier? Dat sinn déi zwou grouss Froen, deenen d'Ermëttler den Ament nach noginn. Doriwwer eraus gëtt sech an Éisträich d'Fro gestallt, ob d'Attack net hätt kënne verhënnert ginn.

De spéideren Ugräifer souz schonn am Prisong, well hie versicht hat, sech dem IS unzeschléissen an dobäi an der Tierkei gestoppt gouf. No senger Ausliwwerung an Éisträich gouf hie verurteelt, koum awer méi fréi eraus, ënner der Konditioun, datt hien un engem Deradikaliséierungsprogramm deelhëlt.

Informatioune goufen net iwwermëttelt

Mataarbechter vun deem Programm hunn den Täter nach kuerz virun der Attack als net geféierlech agestuuft. Eng Aschätzung, déi wuel anescht ausgefall wier, wa si gewosst hätten, datt hie schonn am August versicht huet an der Slowakei Munitioun ze kafen.

Den éisträicheschen Inlandsgeheimdéngscht BVT huet dës Informatioun vun hire slowakesche Kolleegen awer net un d'Justiz weiderginn. Och huet de spéideren Täter zwou Persoune getraff, déi zu deem Ablack ënner der Observatioun vum BVT stoungen. Trotz all deem gouf den Täter zur Zäit vun der Attack net méi observéiert.

Regierung proposéiert Mesuren

Wéi et zu all deene Feeler komme konnt, soll elo eng Experte-Kommissioun klären. Op d'Conclusioune vun där Kommissioun wollt déi éisträichesch Regierung awer net waarden an huet schonn e leschte Mëttwoch eng Rei Anti-Terror-Mesurë presentéiert. Esou soll et zum Beispill méiglech ginn, verurteelt Terroristen och no hirer Prisongsstrof anzespären, wa si weiderhin als geféierlech agestuuft ginn.

A wa si ënner Oplage méi fréi fräikommen, da solle si eng Foussfessel kënne kréien. Doriwwer eraus setzt sech Éisträich op europäeschem Plang dofir an, datt Messenger-Appen, wéi zum Beispill Signal oder WhatsApp, besser iwwerwaacht kënne ginn.

D'Detailer zu all dëse Mesurë ginn zwar eréischt ausgeschafft. Fir déi konservativ Regierungspartei ÖVP ginn heimat awer Mesuren ëmgesat, déi si scho méi laang fuerderen. Hire Koalitiounspartner, déi Gréng, ass dogéint beméit ze berouegen. Et géif deemno net rieds goe vun enger Preventivhaft, an et géif een och alles maachen, fir datt déi geplangte Mesuren am Accord mat der Verfassung an der europäescher Mënscherechtskonventioun stinn.

Kritik un de Mesuren

Trotzdeem gëtt et vill Kritik. Esou hätt d'Attack virun zwou Wochen och mat de bestoende Gesetzer kënne verhënnert ginn, wann et net zu enger Rei Panne komm wier. Verschidde Juristen hunn och ugezweiwelt, ob déi ugekënnegt Mesurë verfassungskonform wieren.

Elo scho gëtt et an Éisträich a verschiddene Fäll d'Méiglechkeet fir Verurteelter iwwer hir regulär Prisongsstrof eraus anzespären. Allerdéngs feelt et deenen dofir zoustännegen Institutiounen elo schonn u Capacitéiten, a si wiere primär op psychiatresch Fäll ausgeluecht, esou eng weider Kritik.

An der Mediathéik:

Aktuelles / / radio 100,7 Stephan Polet
Lauschteren

Méi zum Thema

Wien
No der Terrorattack zu Wien

No der Attack zu Wien e Méindeg huet déi éisträichesch Regierung eng Staatstrauer vun dräi Deeg decidéiert. International goufen et Trauer- a Solidaritéitserklärungen. Gläichzäiteg lafen d'Ermëttlungen op Héichtouren.

Net verpassen

  • 17.10. De Gudden Toun

    De Gudden Toun.jpg

    Wann d'Deeg méi kal, gro a kuerz ginn, stécht deen een oder anere vläicht de Kapp nees méi an déi sozial Medien. An der Oktober Editioun schwätzen de Roland Meyer, Ian De Toffoli, Raoul Biltgen, Jeff Schinker an d'Anne Klein.

Programm

Dossieren

  • Bundestagswal 2021

    Däitschland wielt de Samschdeg, 26. September en neie Bundestag. Wat sinn d'Enjeuen, wie gëtt Kanzler oder Kanzlerin, wéi verleeft d'Wahlkampagne. An eisem Dossier zum Theema Bundestagswal gidd Dir alles gewuer.

  • Olympesch Spiller 2021

    D'Olympesch Spiller fannen, mat engem Joer Verspéidung, tëscht dem 23. Juni bis den 8. August zu Tokyo statt. Fir eis op der Plaz ass eise Korrespondent Philip Crowther.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen