Fussball Maxime Chanot, ee Lëtzebuerger Futtballprofi zu New York

Zënter 2 Méint wunnt de Lëtzebuerger Nationalspiller zu White Plains, no beim Trainingsterrain vu senger néier Equipe an bei der Profi-Liga. Hie wier mat senger Fra ausgewandert, fir den amerikaneschen Dram ze liewen, erzielt de Maxime Chanot. Säi Liewen an de Staaten wier anescht, wéi dat an Europa. "Dir gesitt, ech setzen an engem Gebai mat engem Salon, mat enger Sportshal déi esou grouss ass wéi déi a menger Stad doheem. Hei ass enge Boxhal, ee Golfsimulator, eng Spillhal mat Billard a Playstation ... Alles dat ass fir all d'Awunner. Et gëtt ni langweileg. "

De Futtballspiller ass aus dem belsche Courtai an d'USA komm. Hie wier zwar duerch de Sport scho vill gereest, mee et wier déi éischte Kéier, datt hien op New York komm wier. "Et ass eng flott Erfarung, déi fir mech hei ufänkt."

En iwwerraschende Wiessel

Zenter fënnef Joer spillt de Maxime Chanot an der Lëtzebuerger Nationalequipe. Hien ass a Frankräich gebuer, seng Mamm ass Lëtzebuergerin. Am Alter vu 26 Joer huet hie schonn an England, a Schottland, a Frankräich an an der Belsch gespillt. De Wiessel op en anere Kontinent huet iwwerrascht. D'Reaktioune wieren ënnerschiddlech gewiescht, erzielt de Profispiller. Déi, déi net esou vill vu Futtball géife kennen, géife mengen an de Staate géif just Basketball oder Baseball gespillt ginn. "Si mengen, dat hei wier mäi Begriefnes." Déijéineg, déi méi vum Sport géife kennen, wéissten, datt de Niveau vun der amerikanescher Profi-Liga bal esou gutt wier, wéi dee vun de groussen europäesche Championnater.

De New York City FC

Dem Maxime Chanot säin neie Club gëtt et eréischt zënter dräi Joer. De New York City FC ass eng Kreatioun vu Manchester City, dem Club an England deen engem Scheich aus Abu Dhabi gehéiert, an dem Baseball-Club vun de New York Yankees. Séier gouf grouss akaft. Déi fréier Nationalspiller Andrea Pirlo aus Italien, David Villa aus Spuenien a Frank Lampard aus England si Co-Equipéiere vum Maxime Chanot. Et wier eng flott Erfarung, mat esou Leit ze spillen, fënnt de Futtballprofi. Si wiere net nëmme gutt Spiller, mee et kéint een och vun hinne léieren. "Ech passen all Dag um Terrain dorop op wéi si spillen. Hinnen nozekucke mécht Spaass an ech verstinn elo, firwat si Carrière gemaach hunn."

Zefridde mam Spiller

Kierzlech huet de Veräin am Yankees-Stadion an der Bronx géint Chicago Fire gespillt. De Match gouf och op Spuenesch kommentéiert. En neie Club brauch Supporter a spuenesch-sproocheg Immigrante sinn eng Zilgrupp vun NYCFC.

De Commentateur John Rojas fënnt et gutt, datt ee Lëtzebuerger Spiller, dee wahrscheinlech vill Optioune bannent Europa hat, d'amerikanesch Profi-Liga als nächste Schrëtt a senger Carrière gewielt hätt. "Wien näischt iwwer Lëtzebuerg wousst, huet déi lescht Jore kee Futtball gekuckt." Den John Rojas huet dem Maxime Chanot seng fënnef Matcher am Trikot vu sengem neie Club gesinn a säin Androck ass positiv. De Lëtzebuerger Nationalspiller hätt sech dem amerikanesche Futtball ugepasst. "Hien ass gutt an der Loft, staark, a gutt um Ball." De Maxime Chanot géif esou spillen, wéi et sech den Trainer géif wënschen.

Den Trainer, dat ass de fréiere franséische Weltmeeschter Patrick Vieira. "De Maxime ass e Kämpfer, e Gewënner an e gudde Verdeedeger", seet dësen. Hie kéint et net erwaarden, de Spiller nees an der Equipe ze hunn.De Maxime Chanot kann nämlech wéinst enger Verletzung um Réck den Ament net spillen.

Futtball am Yankees-Stadion

D'Spill géint Chicago Fire huet de New York City FC 4-1 gewonnen an domat huet dem Maxime Chanot säi Club sech fir d'Play-offs qualifizéiert. Gespillt gouf viru ronn 25.000 Léit an engem Baseball-Stadion an deem soss d’Yankees spillen. Fir de Maxime Chanot, deen och schonn an dësem Stadion gespillt huet, ass et eng aussergewéinlech Erfarung esou anzwësch ze spillen. "De Yankees-Stadion ass esou mythesch a schéin. Ech si stolz do ze spillen."

De Maxime Chanot huet vir, fir d’Matcher vun der National-Equipe all Kéier zeréck an Europa ze reesen. Déi éischte Kéier war fir hie fir de Qualifikatiouns-Match fir Weltmeeschterschaft am Asaz - eng 4-3 Defaite géint Bulgarien. Hie schwätzt mat senge Co-Equipiere Franséisch mee de Plang wier et fir Lëtzebuergesch ze léieren. "Ech hu Bicher an ech hu menger Mamm versprach datt ech am Dezember Lëtzebuergesch ka schwätzen. Ech hale mäi Verspriechen ... mee soe mir Dezember 2017."

Lauschtert ee Bäitrag mat vill Atmosphär an Andréck aus dem Yankees-Stadium.