Ëffentlechen Transport Mam Zuch an ënner zwou Stonnen op Bréissel?

De Projet fir Pendolino-Zich tëschent der Schwäiz a Bréissel fueren ze loossen, kéint relancéiert ginn. Dat seet de François Bausch am 100,7-Interview.

Den Nohaltegkeets- an Infrastruktur-Minister hat um Bord vun der Ouverture vum Gotthard-Tunnel an der Schwäiz Gespréicher mam neie belschen Transportminister François Bellot, mat der Schwäizer Ministerin Doris Leuthard a mat der Schwäizer Eisebunn.

Pendolino-Zich hunn eng aktiv Neigetechnik a si kënne méi séier an de Kéiere fueren. Mat deem Zuchtyp - an nom Ausbau vun der Zuch-Streck - wier et méiglech, a manner wéi zwou Stonne vu Lëtzebuerg op Bréissel ze fueren, esou de François Bausch. Däitlech manner also, wéi de Moment. Wéini dat kéint méiglech ginn, wier awer nach net gewosst.

"Eng formidabel Saach"

“E Pendolino-Zuch op där Streck wier eng formidabel Saach, och fir eis”, esou de François Bausch.

Bei der Entrevue vun de Regierunge vun der Belsch a Lëtzebuerg am Juli an der Gäichel soll virun iwwert de Projet Pendolino-Zich diskutéiert ginn.

Virun zwee Joer hat et geheescht, datt eng Maart-Etude zur Conclusioun komm ass, datt eng Pendolino-Verbindung tëschent Bréissel a Basel net rentabel genuch wier. Aus den Iddie vun CFL, SNCF, SNCB an der Schwäizer SBB gemeinsam tëschent Bréissel a Basel via Stroossbuerg a Lëtzebuerg där Zich fueren ze loosse, gëtt näischt, hat d’Lëtzebuerger Land den 23. Mee 2014 geschriwwen.

D’Iddi fir där Zich op dëser Streck anzesetzen, ass schonn zënter ville Joren ëmmer erëm am Gespréich: e.a. an de Joren 2008 an 2012 war dovu rieds gaangen.

Pendolino-Zich gi vum franséische Konzern Alstom gebaut. Déi aktiv Neigetechnik gouf vu Fiat aus Italien entwéckelt.