6 Méint Krich an der Ukrain LUkraine: Schwiereg 6 Méint fir Ukrainer:innen zu Lëtzebuerg
De Mëttwoch sinn et op den Dag sechs Méint, datt Russland an d'Ukrain amarschéiert ass. Et hätt ee schwiereg sechs Méint hannert sech, mee et wier een immens houfreg op d'Nouthëllef an d'Noutfallmesuren, déi ee fir d'Ukrain vu Lëtzebuerg aus konnt leeschten, sou den Nicolas Zharov, President vun der Associatioun LUkraine de Mëtten virun der Press.
Zéng equipéiert Ambulanzen, 44 Palette mat medezinescher Versuergung a 770 Tonnen Hëllefsgidder wieren an de lescht Méint mat Hëllef vun der Associatioun an d'Ukrain geschéckt ginn. Nieft der humanitärer Hëllef an der Ukrain selwer, këmmert LUkraine sech och em déi ukrainesche Refugiéen zu Lëtzebuerg. Esou konnten iwwer 1.000 Refugiéen zu Lëtzebuerg bei Privatleit oder a Strukturen ënnerbruecht ginn. fënnef bis zéng Prozent vun den ukrainesche Refugiéë wieren an Tëschenzäit nees zeréck an hir Heemecht gaangen, ënnert anerem wéinst der Logementsproblematik, seet d'Olena Klopota Generalsekretärin vu LUkraine.
Am Moment hätt een nach keng definitiv Léisung, mee et géif een zesumme mat der Caritas, mat der Croix Rouge a verschiddene Ministèren no Léisunge sichen, fir de Leit Logement zur Verfügung ze stellen.
LUkraine fuerdert weider eng besser Kommunikatioun
Eng Zesummenaarbecht déi sech den Ament awer als net esou einfach erausstellt, erkläert de President vu LUkraine den Nicolas Zharov eis erkläert. Et géif Kommunikatiounsprobleemer mat Ministère ginn.
"Monsieur Bettel a annoncé lors de notre premier rendez-vous, qu'il y aurait un groupe interministériel qui serait créé, mais à ce jour ce groupe n'est pas créé."
Onkloerheet ronderëm de Schutzstatus
Och wat d'Aarbechtssituatioun vu verschidden ukrainesche Flüchtlingen zu Lëtzebuerg ugeet, géif et nach Onkloerheeten, sou den Nicolas Zharov. Am Moment wier zum Beispill nach net kloer, wéi et mam temporäre Schutzstatus vun den Ukrainer:innen zu Lëtzebuerg viru geet.
De Statut de Protection temporaire fir ukrainesch Refugiéë gëllt nach bis de 4 Mäerz 2023. Esou laang d'EU et net anescht decidéiert, gëtt de Statut nom véierte Mäerz, maximal fir ee Joer verlängert.
Méi zum Thema
Ukraine a Moldawien offiziell EU-Bäitrëtts-Kandidaten
D'Ukrain a Moldawien kruten en Donneschdeg um EU-Sommet de Statut vun EU-Bäitrëttskandidaten. Decisioun gouf ënnert de 27 Staats- a Regierungscheffen eestëmmeg geholl.
LUkraine fuerdert besser Koordinatioun tëscht de Ministèren
Den Accueil zu Lëtzebuerg vun den ukrainesche Refugiée wier no dräi Méint Krich ewell besser rodéiert, mee et géif nach ëmmer un Zesummenaarbecht a Koordinatioun tëschent den zoustännegen Familljen- an dem Ausseministère feelen, sou d'Associatioun LUkraine.
